دبئی ۔6نومبر (اے پی پی):متحدہ عرب امارات کے محکمہ سیاحت و معیشت نے کہا ہے کہ سال رواں کے ابتدائی نو ماہ کے دوران 10 ملین سے زیادہ سیاح دبئی آئے ہیں۔الامارات الیوم کے مطابق محکمہ سیاحت و معیشت کے جاری بیان میں بتایا گیا ہے کہ رواں سال جنوری سے ستمبر کے دوران 10.12 ملین غیرملکی سیاح دبئی پہنچے ہیں ۔ جنوری سے ستمبر کے دوران جتنی تعداد میں غیرملکی سیاح دبئی پہنچے ہیں ان کی تعداد کورونا وائرس کی وبا سے پہلے آنے والے سیاحوں کی تعداد کے قریب ہے۔
محکمہ سیاحت و معیشت نے بتایا کہ جنوری سے ستمبر 2022 کے دوران سب سے زیادہ سیاح بھارت سے آئے جن کی تعداد 1.2 ملین سے زیادہ ریکارڈ کی گئی ہے، سلطنت عمان سے10لاکھ، سعودی عرب سے 9 لاکھ 7 ہزار ، برطانیہ سے7 لاکھ 20 ہزار،روس سے 4 لاکھ 54 ہزار، امریکا سے 3 لاکھ 91 ہزار، پاکستان سے 2 لاکھ 79 ہزار، فرانس سے 2 لاکھ 69 ہزار، جرمنی سے 2 لاکھ 68 ہزار جبکہ ایران سے 2 لاکھ 47 ہزار سیاح دبئی آئے ہیں۔
Short Link: https://urdu.app.com.pk/urdu/?p=336041
