دبئی ۔25ستمبر (اے پی پی):دبئی کے حکمران، نائب صدر اور متحدہ عرب امارات کے وزیر اعظم شیخ محمد بن راشد المکتوم نے دبئی کے عدالتی حکام کے رکن کے طور پر دبئی کے سرکاری ملازمین کی تقرری کو ریگولیٹ کرنے کا فرمان جاری کیا ہے۔خبر رساں ادارے وام کے مطابق شیخ محمد بن راشد المکتوم کا فرمان دبئی کے عدالتی حکام میں قومی صلاحیتوں کو راغب کرنے کی کوشش کرتا ہے، جبکہ دبئی جوڈیشل انسٹی ٹیوٹ میں ان کی تربیت کے دوران ملازمین کی قانونی حیثیت، حقوق اور مالی استحقاق کا تحفظ کرتا ہے۔
انسٹی ٹیوٹ کی جانب سے فراہم کی جانے والی تربیت میں ججوں کے لیے جوڈیشل اینڈ لیگل اسٹڈیز پروگرام اور پبلک پراسیکیوٹرز کے لیے لیگل اینڈ جوڈیشل سائنسز میں ڈپلومہ شامل ہے۔ مزید برآں، فرمان اس بات کو یقینی بناتا ہے کہ ملازمین انسٹی ٹیوٹ میں تربیت حاصل کرتے ہوئے اپنے متعلقہ سرکاری اداروں کے اندر اپنے عہدوں کو برقرار رکھ سکتے ہیں۔
وام کے مطابق منگل کو جاری کیئے گئے فرمان کی شقوں کا اطلاق انسانی وسائل کے ضوابط کے تحت چلنے والے سرکاری اداروں میں کام کرنے والے اہل سویلین اور فوجی ملازمین پر ہو گا۔حکم نامے میں تربیتی مدت کے دوران ملازمین کے حقوق کا خاکہ پیش کیا گیا ہے، جس میں ان کے سرکاری ادارے کے ہیومن ریسورس ریگولیشنز کے مطابق ان کی مکمل ماہانہ تنخواہ حاصل کرنا شامل ہے،
جس میں الاؤنسز یا اضافی فوائد شامل نہیں ہیں۔حکم نامے میں پروگرام میں شامل ملازمین کو تربیتی چھٹی دینے کی شرائط کا بھی خاکہ پیش کیا گیا ہے، جس میں کہا گیا ہے کہ وہ متحدہ عرب امارات کے شہری ہوں گے ۔
