اسلام آباد۔29اگست (اے پی پی): نیشنل ڈیزاسٹر مینجمنٹ اتھارٹی (این ڈی ایم اے) نے دریائے ستلج میں درمیانے درجے کے سیلاب میں کمی کا رجحان برقرار رہنے کا امکان ظاہر کرتے ہوئے ممکنہ صورتحال کے پیش نظر متعلقہ اداروں کے لئے ضروری اقدامات پر مبنی ایڈوائزری جاری کی ہے۔
این ڈی ایم اے کی مون سون اپڈیٹ کے مطابق گنڈا سنگھ والا، اسلام اور سلمانکی کے مقام پر دریائے ستلج میں درمیانے درجے کے سیلاب میں کمی کا رجحان برقرار ہے۔ سیلاب صورتحال کے باعث جن اضلاع کو خطرہ ہے ان میں قصور، اوکاڑہ، بہاولنگر، پاکپتن اور وہاڑی شامل ہیں۔
اس حوالے سے این ڈی ایم اے کی ایڈوائزری میں کہا گیا ہے کہ پنجاب پی ڈی ایم اے دریائے ستلج پر جی ایس والا، سلیمانکی اور اسلام کے نشیبی علاقوں کی آبادی کو بروقت پیشگی انتباہ اور خطرے سے دوچار افراد کے انخلاء کو یقینی بنائے اور کیمپوں میں بے گھر لوگوں کو طبی دیکھ بھال اور امدادی اشیاء کی فراہمی کو یقینی بنائے۔
علاوہ ازیں حساس علاقوں کی جانب ٹریفک کی منظم نگرانی کی جائے. ہنگامی صورتحال سے نمٹنے کیلئے مشینری تیار رکھیں۔ نشیبی علاقوں میں رہائش پذیر لوگ کہ نقل مکانی کیلئے انتظامات کیے جائیں۔
Short Link: https://urdu.app.com.pk/urdu/?p=383891
