دریائے ستلج میں درمیانے سے اونچے درجے کا سیلاب کا امکان ہے، پی ڈی ایم اے

لاہور۔16اگست (اے پی پی):ترجمان پراونشل ڈیزاسٹر مینجمنٹ اتھارٹی پنجاب نے دریائے ستلج میں درمیانے سے اونچے درجے کے سیلاب کا امکان ظاہر کر دیا۔ بدھ کے روز جاری بیان میں انہوں نے بتایا کہ گزشتہ شب صرف 6 گھنٹوں میں دریا میں پانی کی سطح 36560 کیوسک سے بڑھ کر 55900 کیوسک ہو گئی، 17 سے 20 اگست کے دوران پانی کی سطح ایک لاکھ کیوسک سے تجاوز کرنے کا امکان ہے، گنڈا سنگھ والا کے مقام پر پانی کا اخراج مسلسل بڑھ رہا ہے جو شدت اختیار کر سکتا ہے۔

ترجمان کا مزید کہنا ہے کہ بھارتی ڈیموں میں پانی کی سطح میں اضافے سے پاکستانی حدود متاثر ہوں گی، بھارتی بکھرا ڈیم اور پونگ ڈیم میں پانی کی سطح خطرناک حد تک بڑھ چکی ہے، بھارت سے پانی کی آمد کے باعث پاکستانی رقبے زیر آب آنے کا خدشہ ہے، تمام محکمے عوام کے جان و مال کے تحفظ کے لئے الرٹ ہیں، اداروں کو ایمرجنسی صورتحال بارے اطلاعات فراہم کی جا چکی ہیں۔

ترجمان نے بتایا کہ ڈی جی پی ڈی ایم اے عمران قریشی نے ہدایت کی ہے کہ دریائے ستلج میں سیلاب کے پیش نظر تمام انتظامیہ ہائی الرٹ رہے، پی ڈی ایم اے کنٹرول روم میں لمحہ بہ لمحہ صورتحال مانیٹر کی جا ئے، مقامی آبادی اور فصلوں کو سیلاب سے بچانے کے لئے ہر ممکن اقدامات کئے جائیں، دریائے ستلج کے راستے میں قائم آبادیاں احتیاطی تدابیر اختیار کریں اور شہری غیر ضروری نقل و حمل اور نالوں کی کراسنگ سے گریز کریں۔

Short Link: https://urdu.app.com.pk/urdu/?p=379955