راولپنڈی۔ 28 فروری (اے پی پی):سگنل فری مال روڈ راولپنڈی منصوبہ پرپنجاب حکومت نے تعمیراتی کام کا آغاز کر دیا ہے۔ صوبائی وزیر تعمیرات و مواصلات و قانون ملک صہیب احمد بھرتھ نے اس حوالے سے بتایا کہ جی پی او چوک تا ٹی ایم چوک انڈرپاس بنایا جائے گا۔
ایک کلومیٹر لمبے انڈر پاس پر 4.3 ارب روپے لاگت آئے گی۔ٹریفک جام ہونے کی وجہ سے لوگوں کو مشکلات کا سامنا تھا۔انڈر پاس بننے سے تقریباً سوا دو لاکھ گاڑیوں کو فائدہ ہوگا۔ انہوں نے بتایا کہ متبادل راستوں اور بجلی اور سوئی گیس کی سروسز کو منتقل کرنے کامکمل کر دیا گیا ہے۔تمام محکمے یکسوئی کے ساتھ کام کر رہے ہیں۔
عوام اور منصوبے کی مربوط کوآرڈینیشن کے لیے مشترکہ کنٹرول روم موقع پر بنایا گیا ہے۔ صوبائی وزیر ملک صہیب احمد بھرتھ نے کہا کہ آج سے پی سی چوک سے اے ایف آئی سی تک سڑک بند رہے گی۔ کاروباری حضرات اور اہم دفاتر تک راستہ مہیا کیا گیا ہے۔
اے ایف آئی سی اور ایم ایچ جانے کے لیے پشاور روڈ کی جانب سے راستہ کھلا ہے۔ائیرپورٹ یا موٹروے جانے کے لیے متبادل راستے کا استعمال کریں روات سے اسلام آباد ایکسپریس وے کا استعمال کریں۔ انہوں نے عوام الناس سے منصوبہ کی کامیابی اور بروقت تکمیل کے لیے تعاون کی اپیل کی ہے۔
Short Link: https://urdu.app.com.pk/urdu/?p=567388
