راولپنڈی ۔10مارچ (اے پی پی):محکمہ موسمیات نے راولپنڈی ڈویژن کے مختلف علاقوں میں بارش اور پہاڑی علاقوں میں برفباری کا امکان ظاہر کیا ہے۔ ترجمان محکمہ موسمیات کے مطابق راولپنڈی، مری، اٹک، چکوال، جہلم، تلہ گنگ سمیت بالائی پنجاب کے دیگر علاقوں میں رواں ہفتے بارش کا امکان ہے۔ ان علاقوں میں کہیں ہلکی بارش اور کئی مقامات پر بارش کے ساتھ تیز ہواؤں کا امکان ہے۔
محکمہ موسمیات نے ملکہ کوہسار مری، گلیات اور گرد ونواح میں بارشوں اور برفباری کا امکان ظاہر کیا ہے۔ مری اور گردونواح میں بارشوں اور برفباری کا سلسلہ 16 مارچ تک وقفے وقفے سے جاری رہنے کا امکان ہے۔ دوسری جانب موسمی صورتحال کے پیش نظر ضلعی انتظامیہ مری کی جانب سے سیاحوں کے لیے ایڈوائزری جاری کر دی ہے جس کے مطابق سیاح مری آنے سے پہلے پرنٹ، الیکٹرانک اور سوشل میڈیا سے موسمیاتی صورتحال سے آگاہی حاصل کریں۔
ضلعی انتظامیہ مری نے سیاحوں اور مسافروں سے کہا ہے کہ وہ سفر کے دوران محتاط رہنے اور موسم کی صورتحال کے مطابق سفر کا پروگرام ترتیب دیں۔ سیاح ٹریفک کی روانی کے لیے ٹریفک پولیس سے تعاون کریں اور ٹریفک مینجمنٹ پلان پر عملدرآمد یقینی بنائیں۔
Short Link: https://urdu.app.com.pk/urdu/?p=570837
