اسلام آباد۔29اپریل (اے پی پی):وفاقی وزیر ریلوے محمد حنیف عباسی کی ہدایات پر راولپنڈی میں ڈویژنل سپرنٹنڈنٹ ریلوے نور الدین داوڑ کی زیر صدارت اہم اجلاس منعقد ہوا۔پاکستان ریلویز راولپنڈی ڈویژن نے سٹیشنز پر صفائی کے نظام کو مزید بہتر بنانے کے لیے راولپنڈی ویسٹ مینجمنٹ کمپنی (آر ڈبلیو ایم سی) کے ساتھ ایک اہم معاہدہ کیا ہے۔ اس معاہدے کے تحت راولپنڈی، مارگلہ اور چکلالہ ریلوے سٹیشنز کی صفائی اب راولپنڈی ویسٹ مینجمنٹ کمپنی کے حوالے کر دی گئی ہے۔
پاکستان ریلوے کے مطابق یہ اقدام مسافروں کو صاف ستھرا اور صحت مند سفر فراہم کرنے کے لیے کیا گیا ہے۔ ڈویژنل سپرنٹنڈنٹ ریلوے راولپنڈی نور الدین داوڑ نے اس عزم کا اظہار کیا کہ پاکستان ریلوے کا مقصد سٹیشنز کو عالمی معیار کے مطابق صاف ستھرا بنانا ہےتاکہ مسافروں کو بہترین سہولتیں فراہم کی جا سکیں۔آر ڈبلیو ایم سی کے منیجنگ ڈائریکٹررانا ساجد صفدر نے اس موقع پر اعلان کیا کہ ان کی کمپنی صفائی کے عمل کو مزید بہتر بنانے کے لیے جدید مشینری اور تربیت یافتہ عملہ فراہم کرے گی۔
پاکستان ریلوے کا عزم ہے کہ ریلوے سٹیشنز اور دیگر سہولتیں عالمی معیار کے مطابق صاف ستھرا ہوں تاکہ مسافروں کو ایک خوشگوار سفر کا تجربہ حاصل ہو۔ اس شراکت داری سے صاف ستھرا ریلویز اور ایک ستھرا پاکستان بنانے کی جانب ایک قدم اور بڑھایا گیا ہے۔ انہوں نے کہا کہ وفاقی وزیر ریلوے محمد حنیف عباسی کے وژن کے مطابق پاکستان ریلوے کو صاف ستھرا اور صحت مند بنانا ہماری اولین ترجیح ہے۔
Short Link: https://urdu.app.com.pk/urdu/?p=589478