اسلام آباد۔2اپریل (اے پی پی):وزیر اعظم عمران خان نے کہا ہے کہ رمضان کا مقدس مہینہ ہمیں اپنی خواہشات پر قابو پانے اور ایسے کام جو عام مہینوں میں جائز ہیں ان سے بھی باز رہنے کا درس دیتا ہے،ریاست مدینہ کے ماڈل پر ایک ایسی فلاحی ریاست کے قیام کے لیے جدوجہد کی جہاں ہر شہری کو عہدے، دولت، ذات پات اور نسل کی تمیز کئے بغیربرابر کے حقوق حاصل ہوں اور جہاں قانون کی حکمرانی ہو۔
ہفتہ کو رمضان المبارک کے موقع پر اپنے پیغام میں وزیراعظم عمران خان نے کہا کہ میں اپنی اور میری حکومت کی طرف سے تمام پاکستانیوں اور پوری مسلم اُمہ کو رمضان المبارک کے آغاز پر مبارک باد پیش کرتا ہوں،رمضان کا مقدس مہینہ ہمیں اپنی خواہشات پر قابو پانے اور ایسے کام جو عام مہینوں میں جائز ہیں ان سے بھی باز رہنے کا درس دیتا ہے۔
وزیر اعظم نے کہا کہ یہ رمضان خاص اہمیت کا حامل ہے کیونکہ ہمیں نیکی اور بدی کے درمیان کشمکش کا سامنا ہے۔ اللہ تعالی نے ہمیں صحیح اور غلط میں سے درست انتخاب کرنے کے لیے ضمیر کا عظیم تحفہ دیا ہے۔
امر بالمعروف و نہی عن المنکر یعنی نیکی کا حکم دینے اور برائی سے منع کرنے کی ہدایت انسان کو دوسری مخلوقات سے ممتاز کرتی ہے۔انہوں نے کہا کہ میں اسے اپنی خوش قسمتی سمجھتا ہوں کہ میں نے ریاست مدینہ کے ماڈل پر ایک ایسی فلاحی ریاست کے قیام کے لیے جدوجہد کی جہاں ہر شہری کو عہدے، دولت، ذات پات اور نسل کی تمیز کئے بغیربرابر کے حقوق حاصل ہوں اور جہاں قانون کی حکمرانی ہو۔
اس موقع پر میں تمام اہل ایمان سے گزارش کرتا ہوں کہ برائی پر نیکی کا انتخاب کریں اور خود کو برائیوں سے روکتے ہوئے ثابت قدم رہیں ۔
وزیر اعظم نے کہا کہ اللہ تعالیٰ سے دعا ہے کہ یہ رمضان تمام مسلمانوں اور ہمارے پیارے ملک کے لیے امن، خوشی اور اطمینان کا باعث ہو۔
