اسلام آباد ۔ 23 اکتوبر (اے پی پی) رواں مالی سال 2018-19ءکی پہلی سہ ماہی کے دوران کرنٹ اکاونٹ خسارہ میں 2.5 فیصد کی کمی واقع ہوئی ہے۔ بیرون ملک مقیم پاکستانیوں کی جانب سے بھیجی جانے والی ترسیلات زر میں 13 فیصد کے اضافہ اور خدمات کے شعبہ کے خسارہ میں گذشتہ مالی سال کے مقابلہ میں 26 فیصد کی کمی سے حسابات جاریہ کے خسارہ میں کمی ہوئی ہے جو گذشتہ پندرہ ماہ کے مقابلہ میں سب سے کم رہی ہے۔ سٹیٹ بینک آف پاکستان (ایس بی پی) کی رپورٹ کے مطابق رواں مالی سال میں جولائی تا ستمبر 2018ءکی سہ ماہی کے دوران حسابات جاریہ کا ملکی خسارہ 3.665 ارب ڈالر تک کم ہو گیا جبکہ گذشتہ مالی سال میں جولائی تا ستمبر 2017ءکے عرصہ میں کرنٹ اکاونٹ خسارہ 3.761 ارب ڈالر ریکارڈ کیا گیا تھا۔
