ریاض۔26اپریل (اے پی پی):سعودی عرب نے وژن 2030 کی سالانہ رپورٹ جاری کر دی ہے جس میں بتایا گیا کہ وژن کے تحت متعین کردہ 1502 اقدامات میں سے 85 فیصد حاصل کیے جا چکے ہیں۔اردو نیوز کے مطابق شاہ سلمان بن عبدالعزیز نے کہا ہے کہ وژن 2030 کے تحت ایک دہائی سے بھی کم عرصے میں مملکت نے جو کامیابیاں حاصل کی ہیں،انہوں نے عالمی سطح پر سعودی عرب کو تبدیلی کے لیے ایک ماڈل بنا دیا ہے۔
انہوں نے کہاکہ آنے والی نسلوں کےلیے مزید پائیدار ترقی کے حصول کےلیے مملکت میں تعمیراتی عمل کو مل کر جاری رکھا جائے گا،ہم اپنے شہریوں کی غیرمتزلزل وابستگی پر فخر کرتے ہیں جن کی کوششوں نے ترقی کے ایک نئے دور کی بنیاد رکھی، ہم مل کر ترقی کے اس سفر کو آگے بڑھاتے ہیں اور آنے والی نسلوں کے لیے اپنے ملک کا مستقبل سنوارنے کے لیے متحد ہیں۔
سعودی ولی عہد شہزادہ محمد بن سلمان نے کہا کہ وژن 2030 کے نو سال مکمل ہونے پر اپنے عوام کی کامیابیوں پر فخر محسوس کرتے ہیں۔انہوں نے عزائم کو عمل میں اور اہداف کو سنگ میل میں تبدیل کردیا، ہم نے نہ صرف اہم اہداف کو پورا کیا بلکہ بہت سے اہداف کو عبور کیا ہے۔ولی عہد نے کہا کہ آنے والے وقت کی طرف دیکھتے ہوئے ہمارا عزم پہلے سے کہیں زیادہ مضبوط ہے۔
ہم رفتار بڑھائیں گے، ہر موقع کو اپنائیں گے۔ عالمی رہنما کے طور پر مملکت کی پوزیشن کو مزید بلند کریں گے۔خادم حرمین شریفین شاہ سلمان بن عبدالعزیز اور ولی عہد مملکت و وزیراعظم شہزادہ محمد بن سلمان کی ہدایات اور بیان کردہ طریقہ کار پر عمل کرتے ہوئے اہداف کےحصول کی راہیں آسان ہوئیں۔سعودی ولی عہد نے کہا کہ کامیابیوں کا آغاز ہمیشہ وژن سے ہوتا ہے اور سب سے کامیاب وژن وہ ہوتا ہے جس پر بھرپور طریقے سے عمل درآمد کیا جائے۔اس میں کوئی شک نہیں کہ مملکت میں ہر سطح پر نمایاں تبدیلی دیکھی گئی ہے جو وژن 2030 کے اہداف کے حصول سے ہی ممکن ہوئی۔وژن2030 کے اہداف میں انسانی و قدرتی وسائل کو بروئے کار لاتے ہوئے معاشی طاقت میں اضافہ کیا گیا ساتھ ہی وژن کے اہداف کو حاصل کرنے کےلیے سرمایہ کاری کو فروغ دیا گیا۔
سعودی عرب کے وژن 2030 نے ایک واضح راستے کا تعین کرتے ہوئے شہریوں اور مقیمین وزائرین کے لیے نئی راہوں کے در وا زے کھولے۔وژن کے تحت تین بنیادی مراحل متین کیے گئے جن میں سے ہر ایک مرحلے کے لیے 5 سال کا وقت مقرر کیا گیا تھا۔پہلے مرحلے کا آغاز بنیادی معاشی، مالیاتی امور و سماجی اصلاحات میں تبدیلی کے لیے بنیادی ڈھانچہ یا فریم ورک متعین کرکے اس پر عمل درآمد کا تھا۔ دوسرے مرحلے میں ترجیحی شعبوں کے لیے متعین کیے گئے اہداف کے حصول کے لیے جدوجہد کو تیز کرنا تھا۔ وژن 2030 کو شروع ہوئے نو سال ہو گئے ہیں ، ان سالوں میں حاصل کی گئی کامیابیوں کی فہرست اگرچہ بہت طویل ہے تاہم اس بارے میں جاری کی گئی سالانہ رپورٹ برائے سال 2024 میں ان کا ذکر کیا گیا ہے۔
جاری سالانہ رپورٹ کے مطابق وژن کے آغاز سے اب تک مقررہ اقدامات کے حصول میں 85 فیصد کامیابی حاصل ہو چکی ہے جو اس بات کی علامت ہے کہ وژن کے اہداف کے حصول کے لیے منتخب کیے جانے والا راستہ درست ہے۔ اب تک 674 اقدامات حاصل کیے جاچکے ہیں جبکہ 596 درست ٹریک پر جاری ہیں۔
Short Link: https://urdu.app.com.pk/urdu/?p=588147
