فیصل آباد ۔ 18 فروری (اے پی پی):زرعی ٹاسک فورس پنجاب نے جعلی زرعی ادویات و غیرمعیاری کھادوں کی تیاری میں ملوث افراد کے خلاف کریک ڈاؤن کے دوران گزشتہ ماہ لاکھوں روپے مالیت کی کھادیں ضبط کر لیں۔
نظامت زرعی اطلاعات محکمہ زراعت پنجاب کے ترجمان کے مطابق صوبہ بھر میں جعلی زرعی ادویات و غیرمعیاری کھادوں کی تیاری میں ملوث افراد کے خلاف کریک ڈاؤن جاری ہے اور گزشتہ ماہ صوبہ بھر میں ایسے عناصر کے خلاف کارروائیوں کے دوران17 چھاپے مارے گئے اور17 ایف آئی آرز کا اندراج عمل میں لایا گیا جبکہ لاکھوں روپے مالیت کی جعلی زرعی ادویات و غیر معیاری کھادوں کو ضبط کیاگیا ہے۔
انہوں نے کہا کہ جعلی زرعی مداخل فروخت کرنے والے مافیا کے خلاف آہنی ہاتھوں سے نمٹا اور اس گھناؤنے کاروبار میں ملوث افراد کو قرار واقعی سزا دی جارہی ہے۔انہوں نے کہا کہ حکومت پنجاب جعلی زرعی ادویات کا کاروبار کرنے والوں کے خلاف زیرو ٹالرنس پالیسی کے اصول پر عمل پیرا ہے اور اس کاروبار کی بیخ کنی کےلئے تمام ممکنہ کارروائیاں عمل میں لائی جارہی ہیں۔انہوں نے کہا کہ اس ضمن میں محکمہ زراعت ٹھوس شواہد کی بنا پر ملزمان کے خلاف ہر سطح پر اپنی کارروائیاں جاری رکھے ہوئے ہے اور جعلی زرعی ادویات کے کاروبار میں ملوث افراد کوقانون کے حوالے کیا جا رہا ہے۔
انہوں نے کہا کہ عوام جعلی زرعی مداخل فروخت کرنے والے عناصرکے خلاف شکایات بذریعہ ایس ایم ایس وواٹس ایپ نمبر2955539۔0300 پر کرسکتے ہیں۔انہوں نے کہا کہ ایسے تمام عناصر کے خلاف اطلاع موصول ہونے کے24 گھنٹے کے اندر کارروائی عمل میں لائی جائے گی۔
Short Link: https://urdu.app.com.pk/urdu/?p=562553
