جدہ ۔27اکتوبر (اے پی پی):سعودی عرب کی میزبانی میں گزشتہ روز جدہ میں اسلامی تعاون تنظیم ( او آئی سی) کے ہیڈ کوارٹر میں ساحل اور جھیل چاڈ بیسن میں بے گھر افراد اور پناہ گزینوں کی مدد کےلیے ڈونرز کانفرنس میں 1.1 ملین ڈالر کی امداد کے وعدے کیے گئے ہیں۔ایس پی اے کے مطابق جدہ میں اسلامی تعاون تنظیم کے ہیڈ کوارٹر میں منعقدہ تقریب سے سعودی نائب وزیر خارجہ انجینئر ولید بن عبدالکریم الخریجی نے اپنے خطاب میں کہا کہ مملکت نے اپنی پوری تاریخ میں ضرورت مند ملکوں اور افراد کی مدد کےلیے ہر ممکن کوشش کی اور دنیا بھر میں متاثرین کو بلا امتیاز مدد فراہم کی ہے۔
انہوں نے کہا کہ سعودی عرب،امدادی ایجنسی شاہ سلمان مرکز کے ذریعے ہیومینٹرین ایشوز کی خدمت کےلیے اپنی تمام صلاحیتوں اور وسائل کو بروئے کار لایا ہے۔انہوں نے امید ظاہر کی اس شعبے میں یہ موثر سعودی کوششیں سلامتی اور استحکام کے قیام میں معاون ثابت ہوں گی اور تمام علاقوں میں امن قائم رہے گا۔او آئی سی کے سیکرٹری جرل حسین ابراہیم طحہ نے کہا کہ ’کانفرنس کا مقصد ساحل اور جھیل چاڈ کے ممالک کی مدد کے لیے ضروری مالی وسائل کو متحرک کرنا ہے۔
انہوں نے متاثرین کی فوری مدد کی اہمیت اجاگر کرتے ہوئے ڈونر مملک، او آئی سی کے اداروں اور پارٹنرز سے تعاون کی اپیل کی۔اقوام متحدہ کے سیکرٹری جنرل انتونیو گوتریس نے کانفرنس کے انعقاد پر سعودی عرب اور او آئی سی کا شکریہ ادا کیا۔
Short Link: https://urdu.app.com.pk/urdu/?p=517456
