سعودی عرب قابل اعتماد دوست اور سٹریٹجک اتحادی ہے، بھارتی وزیر اعظم

نئی دہلی ۔22اپریل (اے پی پی):بھارت کے وزیراعظم نریندر مودی نے سعودی عرب کے ساتھ باہمی تعلقات کے فروغ کو سراہا ہے۔نریندر مودی نے عرب نیوز کو انٹرویو میں سعود مملکت کو ایک بااعتماد دوست اور سٹریٹجک اتحادی قرار دیا۔

انہوں نے کہا کہ 2019 میں سٹریٹیجک پارٹنرشپ کونسل کی تشکیل کے بعد سے دو طرفہ تعلقات میں نمایاں وسعت آئی ہے۔ انہوں نے کہاکہ ہمارا تعلق لامحدود طور پر بڑھنے کی صلاحیت رکھتا ہے۔ غیریقینی کی صورت حال سے بھری اس دنیا میں ہمارا تعلق کسی ستون کی مانند مضبوط ہے۔

نریندر مودی نے ولی عہد اور وزیراعظم شہزادہ محمد بن سلمان کی قیادت کو سراہتے ہوئے انہیں باہمی تعلقات کا مضبوط حامی قرار دیا، اور کہا کہ انہوں نےشہزادہ محمدبن سلمان نے وژن 2030 کے تحت اصلاحات کرکے بطور وژنری شخصیت دنیا بھر کی پذیرائی سمیٹی ہے۔ بھارتی وزیراعظم کا مزید کہنا تھا کہ میں جب بھی ولی عہد سے ملا، ان کے اعلیٰ شاہی انداز نے بہت متاثر کیا۔

ان کی بصیرت، آنے والے وقت کے لئے سوچ اور اپنے لوگوں کے لئے جذبہ واقعی تعریف کے قابل ہے۔انہوں نے مشترکہ معاشی امنگوں کو اجاگر کرتے ہوئے کہا کہ عالمی طور پر سامنے آنے والے چیلنجز کے باوجود دونوں ممالک کے درمیان زراعت، توانائی اور کھادوں جیسے اہم شعبوں میں تجارت بڑھی ہے۔

Short Link: https://urdu.app.com.pk/urdu/?p=585533