قاہرہ۔9فروری (اے پی پی):مصری وزارت خارجہ نے اسرائیلی عہدیداروں کی جانب سے سعودی سرزمین پر فلسطینی ریاست کے قیام کی تجویز سے متعلق بیانات کو ’غیر ذمہ دارانہ‘ قرار دیا ہے۔ عرب نیوز کے مطابق مصری وزارت خارجہ نے ایک بیان میں کہا کہ وہ اس تجویز کو سعودی خود مختاری کی براہ راست خلاف ورزی سمجھتے ہیں اور مملکت کی سلامتی مصر کےلیے’ ریڈ لائن‘ ہے۔
سعودی عرب کا استحکام ، قومی سلامتی مصر اور عرب ممالک کی سلامتی و استحکام کا حصہ ہے۔ اسرائیلی بیان سعودی عرب کی خود مختاری اور فلسطینی عوام کے جائز حقوق پر حملہ ہے۔امارات کے وزیر مملکت خلیفہ بن شاہین المرر نے سعودی عرب کے ساتھ مکمل یکجہتی کا اظہار کرتے ہوئے مملکت کی سلامتی، استحکام، اور خود مختاری کو لاحق تمام خطرات کے خلاف اپنے دیرینہ موقف کا اعادہ کیا۔وام کے مطابق ایک بیان میں انہوں نے کہا کہ امارات سعودی عرب کی خود مختاری کو ایک ناقابل تنسیخ ریڈ لائن سمجھتا ہے۔
انہوں نے فلطیسینوں کے حقوق کے تحفظ کے لیے امارات کے تاریخی اور ٹھوس موقف کا اعادہ کیا، تنازع کے حل اور آزاد فلسطینی ریاست کے قیام کے لیے سنجیدہ سیاسی کوششوں پر زور دیتے ہوئے کہا کہ علاقائی استحکام صرف دو ریاستی حل کے ذریعے ہی حاصل کیا جاسکتا ہے۔
Short Link: https://urdu.app.com.pk/urdu/?p=557801
