دارفور۔2ستمبر (اے پی پی):سوڈان میں لینڈ سلائیڈنگ کے باعث پورا ایک گاؤں مٹی تلے دب گیا جس کے نتیجے میں ایک ہزار سے زائد افراد کے ہلاک ہونے کی اطلاع ہے۔رائٹرز نے سوڈان لبریشن موومنٹ آرمی کا حوالہ دیتے ہوئے کہا ہے کہ اس کی جانب سے جاری کیے گئے بیان میں بتایا گیا ہے کہ واقعہ مغربی سوڈان کے مَرہ نامی پہاڑی علاقے میں پیش آیا جہاں بارش لینڈ سلائیڈنگ کی وجہ بنی اور نیچے آنے والے پتھروں نے پہاڑی کے دامن میں واقع گاؤں کو لپیٹ میں لے لیا۔
رپورٹ کے مطابق کئی روز کی بارش کے بعد 31 اگست کو اچانک مذکورہ علاقے میں بہت بڑی لینڈ سلائیڈنگ ہوئی۔دارفور کے علاقے پر کنٹرول رکھنے والی تحریک کے حکام نے اقوام متحدہ اور بین الاقوامی امدادی اداروں سے اپیل کی ہے کہ وہ ملبے تلے لوگوں کی لاشوں کو نکالنے میں مدد کریں، جن میں بڑی تعداد میں خواتین اور بچے بھی شامل ہیں۔بیان کے مطابق گاؤں بالکل ہموار ہو چکا ہے۔
رپورٹ کے مطابق اس وقت شمالی دارفور کے دارالحکومت الفاشر میں سوڈانی فوج اور ریپڈ سپورٹ فورسز کے درمیان شدید لڑائی جاری ہے۔
