لاہور۔23اپریل (اے پی پی):پنجاب کونسل آف دی آرٹس نے سٹیج ڈراموں میں غیر اخلاقی پرفارمنس دکھانے پر متعدد تھیٹرز کو شوکاز نوٹس جاری کر دیئے۔
ترجمان پنجاب آرٹس کونسل کے مطابق لاہور سمیت گوجرانوالہ، فیصل آباد اور دیگر شہروں کے تھیٹر ہالز کو نوٹسز جاری کئے گئے ہیں۔
متعدد تھیٹرز کو ڈرامہ ایکٹ اورڈرامہ اوقات کی خلاف ورزی پر نوٹس دیئے گئے۔ لاہور میں لیاقت تھیٹر، پنجابی تھیٹر اور کمال تھیٹر کے نام نوٹس جاری ہوئے ہیں۔
ترجمان نے بتایا کہ وزیراعلی پنجاب مریم نواز کے احکامات کی روشنی میں پنجاب بھر میںتھیٹر ڈراموں کی سخت ترین مانیٹرنگ کا فیصلہ کیا گیا ہے، ای مانیٹرنگ کے بعد خلاف ورزی پر نوٹسز دینے کا بھی سلسلہ شروع کر دیا گیا ہے۔
اس حوالے سے پنجاب آرٹس کونسل کے ہیڈ آفس شادمان میں کنٹرول روم قائم کر دیا گیا ہے جبکہ آئندہ ڈراموں کے گانوں کی بجائے مکمل ڈرامے کی فل ڈریس ریہرسل کو مانیٹر کیا جائے گا۔
Short Link: https://urdu.app.com.pk/urdu/?p=586205
