اسلام آباد۔5مئی (اے پی پی):سپریم کورٹ کے آئینی بینچ نے فوجی عدالتوں میں سویلینز کا ٹرائل کالعدم قرار دینے کے فیصلے کیخلاف اپیلوں پر فیصلہ محفوظ کرلیا ، محفوظ فیصلہ رواں ہفتے سنایا جائے گا ۔سپریم کورٹ کے جسٹس امین الدین خان کی سربراہی میں سات رکنی آئینی بینچ نے پیر کو فوجی عدالتوں میں سویلینز کا ٹرائل کالعدم قرار دینے کیخلاف وزارت دفاع کی انٹرا کورٹ اپیل پر سماعت کی۔
بینچ میں جسٹس جمال خان مندوخیل، جسٹس مسرت ہلالی، جسٹس محمد علی مظہر، جسٹس حسن اظہر رضوی، جسٹس نعیم اختر افغان اور جسٹس شاہد بلال حسن شامل تھے۔ دوران سماعت اٹارنی جنرل منصور عثمان اعوان نے اپنے دلائل جاری رکھتے ہوئے کہا کہ نو مئی کو جو کچھ ہوا پہلے اس پر تھوڑی بات کروں گا، سوچے سمجھے منصوبے کے تحت آرمی تنصیبات پر حملہ کیا گیا، نو مئی کو دن تین بجے سے شام تک مجموعی طور پر 39 مقامات پر حملہ کیا گیا۔ اس ملک میں وزیر اعظم کو پھانسی دی گئی مگر تب بھی ایسا احتجاج نہیں ہوا، ماضی میں کسی سیاسی جماعت نے فوجی تنصیبات پر حملہ نہیں کیا تھا۔
جمہوریت بحالی تحریک میں ساری جماعتوں پر پابندی تھی، ایم آر ڈی کی تمام قیادت پابند سلاسل تھی، اصغر خان تین ساڑھے تین سال تک نظر بند رہے، اس دوران بھی نو مئی جیسا قدم کسی نے نہیں اٹھایا۔ اٹارنی جنرل نے کہا کہ نو مئی کو ری ایکشن میں بھی اگر یہ ہوا تو اس کی اجازت نہیں دی جا سکتی، ہمارا ملک ایک عام ملک نہیں ہے۔ جیوگرافی کی وجہ سے ہمیں کافی خطرات کا سامنا رہتا ہے۔
جسٹس جمال مندو خیل نے ریمارکس دیئے یہ سوال تو ہمارے سامنے ہے ہی نہیں کہ جرم نہیں ہوا، آپ اپیل کی طرف آئیں، اپیل کا بتائیں۔ اٹارنی جنرل نے کہا یہ سوال نہ بھی موجود ہو، اس پر بات کرنا ضروری ہے۔ اٹارنی جنرل نے دلائل جاری رکھتے ہوئے کہا کہ جناح ہائوس حملہ میں غفلت برتنے پر فوج نے محکمانہ کارروائی کی، تین اعلیٰ افسران کو بغیر پنشن اور مراعات ریٹائر کیا گیا، بغیر پینشن ریٹائر ہونے والوں میں ایک لیفٹیننٹ جنرل، ایک بریگیڈیئر اور لیفٹیننٹ کرنل شامل ہیں، 14افسران کی کارکردگی پر عدم اطمینان کا اظہار کیا گیا، جس کا مطلب ہے انہیں مزید کوئی ترقی نہیں مل سکتی۔
جسٹس جمال مندو خیل نے استفسار کیا کیا فوج نے کسی افسر کیخلاف فوجداری کارروائی بھی کی؟ اٹارنی جنرل نے کہا فوجداری کارروائی تب ہوتی جب جرم کیا ہوتا، محکمانہ کارروائی نو مئی کا واقعہ نہ روکنے پر کی گئی۔ جسٹس جمال مندو خیل نے ریمارکس دیئے آرمی ایکٹ واضح ہے کہ محکمانہ کارروائی کےساتھ فوجداری سزا بھی ہوگی۔
اٹارنی جنرل نے کہا کہ پنجاب میں تئیس، کے پی آٹھ، سندھ سات اور بلوچستان میں ایک واقعہ ہوا، جی ایچ کیو، لاہور، ائیر بیس میانوالی ، آئی ایس آئی کے دفاتر پر حملے ہوئے، نو مئی کے تمام واقعات اتفاقیہ نہیں تھے، نو مئی کو اگر لاہور پر بیرونی جارحیت ہوتی تو جواب نہیں دیا جاسکتا تھا۔ جسٹس حسن اظہر رضوی نے ریمارکس دیئے بھٹو کی پھانسی کے وقت لوگ گرفتاریاں دیتے تھے، لوگوں نے خود کو آگ لگائی، خودسوزیاں کیں، کسی نے اس وقت پراپرٹی کو آگ نہیں لگائی۔
اٹارنی جنرل نے موقف اختیار کیا میرے والد نے خود بطور سیاسی کارکن مقدمات بھگتے، کبھی کسی کے ذہن میں نہیں آیا کہ پبلک پراپرٹی کو جلا کر پراپرٹی کو نقصان پہنچائیں۔ جسٹس جمال مندو خیل نے استفسار کیا کہ کیا نو مئی کو جو ہوا جرم کی نیت سے ہی ہوا؟ کیا نیت احتجاج ریکارڈ کرانے کی تھی یا حملہ کرنے کی؟ ہوسکتا ہے نیت احتجاج کی ہو مگر معاملہ حد سے تجاوز کرگیا؟ حد سے تجاوز نہیں کرنا چاہئے تھا مگر کر گیا۔
اٹارنی جنرل نے موقف اختیار کیا نو مئی کو جو ہوا جرم ہی تھا۔ جسٹس نعیم اختر افغان نے ریمارکس دیئے کہ کیا بغیر پینشن ریٹائر ہونے والا جنرل کور کمانڈر لاہور تھا؟ اٹارنی جنرل نے جواب دیا جی کور کمانڈر لاہور کو ہی بغیر پینشن ریٹائر کیا گیا۔ جسٹس جمال مندو خیل نے ریمارکس دیئے ملک کے مستقبل کیلئے ہم سوال پوچھ رہے ہیں۔ جسٹس مسرت ہلالی نے ریمارکس دیئے ہمیں بھی اپنے پیارے ملک کے مستقبل کی فکر ہے، آرمی ایکٹ میں کتنی بار ترمیم ہوئی؟ اٹارنی جنرل نے جواب دیا متعدد بار آرمی ایکٹ میں ترمیم ہوچکی ہے۔
اٹارنی جنرل نے کہا فوجی عدالتوں کی سزاوں کیخلاف اپیلیں دائر ہوچکی ہیں۔ اب تک 86 مجرمان اپیلیں کر چکے، باقیوں کو اپیل دائر کرنے کے وقت میں رعایت دیں گے۔ بعد ازاں آئینی بنچ نے فوجی عدالتوں میں سویلینز کا ٹرائل کالعدم قرار دینے کے فیصلے کے خلاف اپیلوں پر فیصلہ محفوظ کرلیا۔ جسٹس امین الدین خان نے کہا کہ محفوظ شدہ فیصلہ اسی ہفتے سنایا جائے گا۔
Short Link: https://urdu.app.com.pk/urdu/?p=592773
