سپیکر قومی اسمبلی کا پیپلز پارٹی کے مرکزی سیکرٹری جنرل تاج حیدر کے انتقال پر گہرے دکھ اور افسوس کا اظہار

اسلام آباد۔8اپریل (اے پی پی):سپیکر قومی اسمبلی سردار ایاز صادق نے پیپلز پارٹی کے مرکزی رہنما تاج حیدر کے انتقال پر گہرے دکھ اور افسوس کا اظہار کیا ہے ۔ منگل کو اپنے تعزیتی پیغام میں انہوں نے کہا کہ سینئر سیاست دان سینیٹر تاج حیدر کی طویل سیاسی، سماجی اور ادبی خدمات کو کبھی فراموش نہیں کیا جاسکے گا۔ تاج حیدر تہذیب اور شائستگی کے پیکر نفیس انسان تھے۔

جمہوریت کے لئے ان کی جدوجہد اور قربانیوں کو ہمیشہ یاد رکھا جائے گا۔ ان کی سیاسی اور سماجی جدوجہد نوجوان نسل کےلیے مثال ہے۔تاج حیدر پاکستانی سیاست میں شعور اور دانش کی شناخت تھے۔ انہوں نے کہا کہ تاج حیدر کے انتقال سے دلی صدمہ ہوا۔اللہ تعالیٰ ان کی مغفرت فرمائے اور ان کے تمام لواحقین کو صبر جمیل عطا فرمائے۔

Short Link: https://urdu.app.com.pk/urdu/?p=579727