تیانجن ۔2ستمبر (اے پی پی):وفاقی وزیر منصوبہ بندی ترقی و خصوصی اقدات پروفیسر احسن اقبال نے کہاہے کہ سی پیک 2.0 کے ذریعے پاکستان کی بندرگاہوں، قابلِ تجدید توانائی اور لائیو اسٹاک کے شعبہ کومضبوط بنانے کے بے پناہ مواقع موجود ہیں،چینی ٹیکنالوجی اور تجربے سے بھرپور استفادہ حاصل کرنے کے لئے پلیٹ فارم بنا رہے ہیں۔انہوں نے یہ بات شنگھائی تعاون تنظیم(ایس سی او) اجلاس کے دوران سی پیک 2.0 کے تحت پاکستان–چین تعاون کے نئے مواقع پر بات چیت کے لیے تیانجن کے دورہ کے موقع پرکہی۔
انہوں نے کہاکہ سی پیک 2.0 کے ذریعے پاکستان کی بندرگاہوں، قابلِ تجدید توانائی اور لائیو اسٹاک سیکٹر کو مضبوط بنانے کے بے پناہ مواقع موجود ہیں،وفاقی وزیر نے ہوان شینگ نیو انرجی سولر پلانٹ کا جائزہ لیا اورکہاکہ ہوان شینگ پلانٹ چوتھے صنعتی انقلاب کی سطح کا خودکار منصوبہ ہے،پاکستان بھی جدید توانائی منصوبوں سے فائدہ اٹھائے گا۔
وفاقی وزیر نے کہاکہ پاکستان زرعی شعبے میں چین کی مدد سے بائیو ٹیکنالوجی کے شعبہ میں بھرپور تعاون کو فروغ دے گا، ہم چینی ٹیکنالوجی اور تجربے سے بھرپور استفادہ حاصل کرنے کے لئے پلیٹ فارم بنا رہے ہیں،مستقبل سولر اور گرین انرجی کا ہے، چینی کمپنی کو پاکستان میں سرمایہ کاری کی دعوت دیتے ہیں۔
انہوں نے کہاکہ ملک میں جدید ریسرچ سینٹرز قائم کر رہے ہیں جو مستقبل کی ترقی کی ضمانت ہیں۔انہوں نے چین میں جانوروں کی ویکسین تیار کرنے والی بڑی کمپنی کا دورہ کیا اورانہیں پاکستان میں پلانٹ لگانے کی پیشکش کی۔وفاقی وزیرنے کہاکہ پاکستان میں لائیو سٹاک زرعی معیشت کا مضبوط ستون ہے، جانوروں کو بیماریوں سے پاک کر کے گوشت کی برآمدات بڑھانا اہم ہدف ہے۔انہوں نے کہاکہ سی پیک 2.0 سے پاکستان اور چین کا تعاون نئی بلندیوں کو چھوئے گا۔
