اسلام آباد۔12دسمبر (اے پی پی):سنٹرل ڈویلپمنٹ ورکنگ پارٹی (سی ڈی ڈبلیو پی) نے 2800 ملین روپے مالیت کے منصوبوں کی منظوری دے دی ہے جبکہ 33419.54 ملین روپے کے منصوبوں کو ایکنک کے پاس بھجوا دیا گیا ہے۔ سی ڈی ڈبلیو پی کا اجلاس ڈپٹی چیئرمین پلاننگ کمیشن ڈاکٹر محمد جہانذیب خان کی زیر صدارت منگل کو منعقد ہوا۔ اجلاس میں فزیکل پلاننگ ، ہائوسنگ ، ٹرانسپورٹ، مواصلات اور پانی کے وسائل سمیت مختلف شعبوں کے منصوبہ جات کا جائزہ لیاگیا۔ اجلاس میں سیکرٹری پلاننگ اوایس منظور سومرا ، پلاننگ کمیشن کے ممبران ، وفاقی اور صوبائی محکموں کے نمائندوں اور وزارت منصوبہ بندی کے سینئر حکام نے شرکت کی۔
اجلاس میں 36.219 ارب روپے کے 4 اہم منصوبوں کا جائزہ لیاگیا۔ 3 منصوبوں کو منظوری کے لئے ایکنک کے پاس بھجوا دیاگیاجبکہ ایک منصوبے کی منظوری دی گئی ۔ اجلاس میں 2022 کے سیلاب سے متاثرہ علاقوں میں بحالی اور تعمیر نو کےچار منصوبوں کا جائزہ لیاگیا ۔ ان منصوبوں میں ریزیلنس انہانسمنٹ اینڈلائیولی ہڈ ڈائیورسفکیشن ان بلوچستان (2800ملین روپے)، ریزیلنس انہانسمنٹ اینڈلائیولی ہڈ ڈائیورسفکیشن ان بلوچستان روڈانفراسٹرکچر(13809.54ملین روپے)، ریزیلنس انہانسمنٹ اینڈلائیولی ہڈ ڈائیورسفکیشن ان بلوچستان اریگیشن انفراسٹرکچر (8250 ملین ) اور اینٹیگریٹڈ فوڈ ریزیلینس اینڈ ایڈاپٹیشن پروگرام (11360 ملین روپے) کے منصوبے شامل ہیں۔ ریزیلنس انہانسمنٹ اینڈلائیولی ہڈ ڈائیورسفکیشن ان بلوچستان روڈانفراسٹرکچرمنصوبے کو منظوری کے لئے ایکنک کے پاس بھجوا دیاگیا ہے۔
اس منصوبے کے لئے عالمی بینک معاونت فراہم کرے گا۔ اجلاس میں لایئولی ہڈ انٹروینشن فار اینٹی گریٹڈ فار فلڈ رزیلینس ان ایڈاپٹیشن پروگرام منصوبے کا جائزہ لیاگیا ۔ منصوبے کے تحت بلوچستان کے پسماندہ اضلاع میں سماجی واقتصادی ترقی کے لئے اقدامات اٹھائے جائیں گے۔ منصوبے کے تحت ان علاقوں میں زراعت اور لائیو سٹاک کے مواقع میں اضافہ کیاجائے گا۔ یہ منصوبہ منظوری کے لئے ایکنک کو بھجوا دیا گیا۔ اجلاس میں ریزیلنس انہانسمنٹ اینڈلائیولی ہڈ ڈائیورسفکیشن ان بلوچستان ایریگیشن انفراسٹرکچر کے منصوبے کاجائزہ لیاگیا، اس منصوبےپر 8250 ملین روپے کی لاگت آئے گی۔ منصوبے کے لئے عالمی بینک معاونت فراہم کرے گا۔
یہ منصوبہ منظوری کے لئے ایکنک کے پاس بھجوا دیا گیا ۔ اجلاس میں ریزیلینس انہانسمنٹ اینڈ لائیولی ہڈڈائیورسیفکیشن ان بلوچستان منصوبےکا جائزہ لیاگیا، اس منصوبے پر 2800 ملین روپے کی لاگت آئے گی ۔ اجلاس میں اس منصوبے کی منظوری دی گئی۔ منصوبے کے تحت بلوچستان میں سیلاب سے متاثرہ اضلاع میں واٹر سپلائی کی سکیموں کی تعمیر نو اور بحالی کا کام مکمل کیا جائےگا۔
Short Link: https://urdu.app.com.pk/urdu/?p=419137
