سیالکوٹ ۔ 29 جنوری (اے پی پی):پاکستان مسلم لیگ ن کے سنیئر رہنما و رکن صوبائی اسمبلی محمد منشاء اللہ بٹ نے کہا ہے کہ وزیر اعلیٰ پنجاب مریم نواز شریف نے صرف 11 ماہ کے دوران ہر شعبہ زندگی سے وابستہ افراد کی فلاح و بہبود کیلئے عملی اقدامات کرکے یہ ثابت کردیا ہے کہ مسلم لیگ ن کی سیاست کا مرکز و محور انسانیت کی خدمت ہے، سیالکوٹ کے ایکسپورٹر پاکستان کا پرچم ہاتھ میں تھامے دنیا بھر میں پاکستان کے سفیر کی حیثیت سے جانے جاتے ہیں اور ملک کی معیشت کو مضبوط بنانے کیلئے اربوں ڈالر کا قیمتی زرمبادلہ کما کر دیتے ہیں اور یہ سب ہماری محنت کشوں اور ہنر مندوں کی بدولت ممکن ہوا ہے کیونکہ سیالکوٹ کے ورکرز کے ہاتھوں سے تیار کی جانے والی مصنوعات کی دنیا بھر میں مانگ ہے اور ان کی ہنر مندی کا لوہا پوری دنیا مانتی ہے۔
یہ بات انہوں نے بدھ کو ایوان صنعت و تجارت سیالکوٹ میں پنجاب ورکرز ویلفیئر فنڈ کی جانب سے 176 ورکرز میں میرج گرانٹس اور ڈیتھ گرانٹس کے چیکس تقسیم کرتے ہوئے کہی۔ ڈپٹی ڈائریکٹر لیبر ویلفیئر طیب ورک، اسد باجوہ، شہباز صائم ، عدنان محمود اکبر بھی موجود تھے۔ محمد منشاء اللہ بٹ نے کہا کہ ورکرز میں ان کے واجبات کی تقسیم قابل تحسین ہے۔
انہوں نے کہا کہ وزیر اعلیٰ پنجاب مریم نواز شریف نے ورکرز کیلئے گرانٹس کے اجراء کو سہل بنا دیا ہے اور اب ورکرز کو دفاتر کے چکر نہیں کاٹنے پڑیں گے وہ گھر بیٹھ کر انٹر نیٹ کے ذریعے آن لائن اپلائی کرے گا اور اس کے واجبات اور گرانٹس کے پرسنل اکاؤنٹ میں منتقل کردی جائیں گی۔ انہوں نے کہا کہ سیالکوٹ سوشل سکیورٹی ہسپتال، ورکرز کے بچوں کیلئے سکولز اور ورکرز کالونی مسلم لیگ ن کے حکومت میں بنائی گئیں۔ انہوں نے کہا کہ سیالکوٹ میں انڈسٹریز کی ترقی کیلئے مسلم لیگ ن نے ہمشیہ چمبر آف کامرس کے ساتھ ملکر کام کرنے کو ترجیح دی ہے۔انہوں نے کہا کہ 500 ایکڑ پر محیط سیالکوٹ ٹینری زون مکمل ہوچکا ہے جبکہ 100 ایکڑ پر سرجیکل سٹی کے قیام کیلئے لینڈ ایکوائر ہوچکی ہے۔ انہوں نے کہا کہ آجر اور آجیر کے مابین بہترین ورکنگ ریلیشن شپ کی بدولت سیالکوٹ کی برآمدات میں اضافہ ہو رہا ہے۔
Short Link: https://urdu.app.com.pk/urdu/?p=553340
