سیالکوٹ۔18اکتوبر (اے پی پی):محکمہ زراعت نے پالک کے کاشتکاروں کو بہترپیداوار کے حصول کے لئے بروقت آبپاشی کی ہدایت کی ہے ۔ ڈپٹی ڈائریکٹرمحکمہ زراعت (توسیع)سیالکوٹ ڈاکٹر رانا قربان علی نے کہا کہ کاشتکار پٹڑیوں پرکاشت کی ہوئی فصل کے لئے پانی کا وقفہ 6سے8دن اورڈرل سے کاشت کی ہوئی فصل کا وقفہ 10 سے 12دن رکھیں۔ انہوں نے کہا کہ جب پودے تین تین پتے نکال لیں تو اس کے گچھے اکھاڑ دیں کیونکہ ایک جگہ زیادہ تعداد میں اُگے ہوئے پودوں کی بڑھوتری متاثرہ پیداوارکم ہونے کاخدشہ ہوتاہے۔
انہوں نے کہا کہ بہتر پیداوارکے لیے پودوں کی چھدرائی میں تاخیر نہ کریں ، دیر سے اکھاڑے جانے پر بچائے جانے والے پودے بھی متاثرہوتے ہیں ۔ کاشتکار بیجائی کے ایک ماہ بعدفصل کی گوڈی کرکے جڑی بوٹیاں تلف کردیں۔ انہوں نے بتایا کہ فصل کی ہرکٹائی کے بعد ایک بوری یوریا فی ایکڑ ڈالنے سےکٹائی تیارہوجاتی ہے۔ اس ضمن میں مزید رہنمائی کے لئے محکمہ زراعت کے فیلڈ سٹاف سے بھی رابطہ کیاجاسکتاہے۔
Short Link: https://urdu.app.com.pk/urdu/?p=514372
