سیالکوٹ۔26فروری (اے پی پی):اسسٹنٹ ڈائریکٹرمحکمہ زراعت (توسیع) سیالکوٹ رانامحمد سلیم شاد نے کاشتکاروں کو بہاریہ کماد کی کاشت 15 مارچ تک مکمل کرنے کی ہدایت کی ہے۔ انہوں نے کہا کہ کاشت سے پہلے بیج کو پھپھوندی کش دوائی کے محلول میں 3 سے5 منٹ تک بھگو کر بوائی سے بہتر نتائج حاصل ہوسکتے ہیں۔ کماد کی کاشت کے لئے منظور شدہ اقسام کا 100 سے 120 من بیج فی ایکڑ استعمال کریں۔
انہوں نے کہا کہ درمیانی زرخیز زمین میں سوا3 بوری یوریا، 2 بوری ڈی اے پی اور 2 بوری پوٹاشیم سلفیٹ فی ایکڑ استعمال کر کے بہتر نتائج اور بہتر پیداوار کا حصول ممکن بنایا جاسکتا ہے۔انہوں نے کہا کہ گہری کھیلیوں میں کاشت سے پانی کی بچت کے علاوہ فصل گرنے سے محفوظ رہتی ہے۔
انہوں نے کاشتکاروں کو مزید ہدایت کی کہ وہ بوائی کے فوراً بعد ہلکا پانی لگائیں اور مناسب وقفہ پر کھیلیاں خشک ہونے پر دوبارہ پانی لگائیں نیز فصل کے مکمل اگاؤ تک حسب ضرورت پانی لگاتے رہنا چاہیئے۔ انہوں نے کہا کہ کاشتکار مزید معلومات، رہنمائی، مشاورت کے لئے محکمہ زراعت کے مقامی دفاتر میں رابطہ کرسکتے ہیں۔
Short Link: https://urdu.app.com.pk/urdu/?p=566422
