سیالکوٹ۔18فروری (اے پی پی):محکمہ زراعت سیالکوٹ نے کاشتکاروں کوشملہ مرچ کی پنیری فروری میں فوری کھیتوں میں لگانے کی ہدایت کی ہے۔زراعت آفیسر مرکز صد ر سیالکوٹ حمیرا یونس نے کہا کہ پنجاب کے میدانی علاقوں میں جہاں شملہ مرچ کا بیج بطور پنیری اکتوبر میں بویا گیا ہووہاں سے پنیری فروری میں کھیتوں میں منتقل کردی جائے تاکہ مئی و جون میں اس کی پیداوارکاحصول ممکن ہوسکے۔انہوں نے بتایا کہ تاخیر سے کاشتہ شملہ مرچ جولائی میں درجہ حرارت بڑھ جانے کے باعث موزیک نامی وائرسی بیماری کاشکار ہوجاتی ہے جس سے فصل کو نقصان پہنچنے کا خدشہ رہتاہے۔
انہوں نے بتایاکہ شملہ مرچ کے لئے بہت زرخیز اور ایسی میرازمین جس میں پانی کا مناسب نکاس ہو موزوں رہتی ہے۔ انہوں نے بتایا کہ شملہ مرچ کی کاشت سے پہلے کھیت میں ایک بار مٹی پلٹنے والا ہل چلا کر زمین کو اچھی طرح ہموار کرلیں اس کے بعد 15 سے 20ٹن گوبرکی گلی سڑی کھا د فی ایکڑ ڈال کر اسے زمین میں ملادیں ۔ انہوں نے کہا کہ اگر وہاں جڑی بوٹیاں اگ آئیں تو فوراً کھیت میں دوبارہ ہل چلائیں ۔
انہوں نے کہا کہ کاشتکار بوقت کاشت کھیت میں فی ایکڑ تین بوری فاسفیٹ اور ایک بوری امونیئم نائٹریٹ ڈال کر کھیت میں سہاگہ چلادیں تاکہ بہتر پیداوار حاصل ہو سکے۔
Short Link: https://urdu.app.com.pk/urdu/?p=562547
