روم ۔18دسمبر (اے پی پی):اٹلی نے کہا ہے کہ وہ شام کی نئی قیادت کے ساتھ مل کر کام کرنے کو تیار ہے ۔ العریبیہ کے مطابق یہ بات اٹلی کی وزیر اعظم جیارجیا میلونی نے ایک بیان میں کہی۔
انہوں نے کہا کہ ان کا ملک شام میں سامنے آنے والی نئی قیادت کے ساتھ روابط اور مل کر کام کرنے کو تیار ہےلیکن ضروری ہے کہ ان سے بعض چیزوں خصوصا مسیحیوں کے معاملے میں احتیاط کی یقین دہانی ہو۔
ان کا کہنا تھا شام کی اپوزیشن جس کی افواج نے بشار الاسد کو اقتدار سے ہٹایا ، کے اقلیتوں کے ساتھ رویے کو دیکھا جائے گا، اچھی اطلاعات اور اشاروں کی بنیاد پر اٹلی شامی قیادت کے ساتھ چلنے کو تیار ہوگا۔
انہوں نے اس سلسلے میں اپنے یورپی اور بین الاقوامی شراکت داروں کے ساتھ بھی چیزیں شیئر کیں۔
وزیراعظم نے کہا پہلا ملنے والا اشارہ بہت اچھا ہے لیکن اس سلسلے میں ہمیں مزید اچھے اشاروں کی ضرورت ہے، لفظوں کے ساتھ ساتھ عمل بھی ہونا چاہیے اس لیے ہم نئے شامی حکام کے بارے میں ان کے عمل کی بنیاد پر ہی فیصلے کریں گے۔
