پشاور۔ 29 اپریل (اے پی پی):شہید بے نظیر بھٹو ویمن یونیورسٹی پشاور کی طالبات نے پیر کے روزبی آر ٹی (بس ریپڈ ٹرانزٹ) سسٹم کا معلوماتی دورہ کیا ۔ دورے کا اہتمام خیبرپختونخوا اربن موبلٹی اتھارٹی اور ٹرانس پشاور کمپنی کی جانب سے یونیورسٹی وائس چانسلر پروفیسر ڈاکٹر صفیہ احمد (T.I) کی سربراہی میں ڈاکٹر سدرہ پرویز، اسسٹنٹ پروفیسر، شعبہ بائیو کیمسٹری اور محترمہ تاشفین ضیا، ڈپٹی رجسٹرار نے کیا تھا جس نے طالبات کو پشاور شہر کے اندر BRT سسٹم کے انتظام اور کام کے بارے میں گہرائی سے جائزہ فراہم کیا۔دورے میں بی آر ٹی کنٹرول روم کا دورہ بھی شامل تھا،
اس دورے نے طالبات کو یہ مشاہدہ کرنے کا موقع فراہم کیا کہ کس طرح یہ نظام پورے شہر میں موثر ٹرانسپورٹ خدمات کو یقینی بناتا ہے ۔بی آر ٹی سسٹم کے منیجنگ ڈائریکٹر کی طرف سے پیش کی گئی ایک پریزنٹیشن میں ماحول دوست طریقوں اور پائیدار موسمیاتی تبدیلی کے اقدامات پر روشنی ڈالی گئی ۔یہ دورہ ایک انمول تعلیمی تجربہ ثابت ہوا جس سے طالبات کے علم میں اضافہ ہوا اور ٹرانسپورٹ کے پائیدار حل کی تعریف ہوئی۔
شہید بےنظیر بھٹو ویمن یونیورسٹی پشاور نے ڈاکٹر طارق عثمان، سی ای او، خیبرپختونخوا اربن موبلٹی اتھارٹی اور ٹرانس پشاور کمپنی اور ان کی ٹیم کا اس دورے کو آسان بنانے کی کوششوں پر تہہ دل سے شکریہ ادا کیا۔ وائس چانسلر نے کہا کہ یونیورسٹی مزید تعاون کی منتظر ہے جو خطے میں کمیونٹی کی شمولیت، تعلیم اور پائیدار طریقوں کو فروغ دیتی رہے گی ۔
