اسلام آباد۔11اپریل (اے پی پی):صدر مملکت آصف علی زرداری نے ضلع لوئر دیر میں کامیاب آپریشن میں 2 خوارج کو جہنم واصل کرنے پر سکیورٹی فورسز کو خراج تحسین پیش کیا ہے۔ جمعہ کو ایوان صدر کے پریس ونگ سے جاری بیان کے مطابق صدر مملکت نے خفیہ معلومات پر مبنی کارروائی کے دوران ہائی ویلیو ٹارگٹ سمیت فتنۃ الخوارج کے 2 دہشت گردوں کا قلع قمع کرنے پر سکیورٹی فورسز کی بہادری کی تعریف کی۔
انہوں نے کارروائی کے دوران دہشت گردوں کے سرغنہ کو جہنم واصل کرنے پر سکیورٹی فورسز کو سراہا اور کہا کہ کارروائی میں دہشت گردوں کے سرغنہ کو ہلاک کرنا سکیورٹی فورسز کی بڑی کامیابی ہے۔ صدر مملکت نے کہا کہ دہشت گردوں کے مکمل خاتمے تک سکیورٹی فورسز کی کارروائیاں جاری رہیں گی۔ آصف علی زرداری نے کہا کہ پاکستان کی سکیورٹی فورسز کا دہشت گردی کے خاتمے کے لیے کامیاب کارروائیاں کرنا خوش آئند ہے۔ انہوں نے فتنۃ الخوارج کے مکمل خاتمے کے قومی عزم کا بھی اظہار کیا
Short Link: https://urdu.app.com.pk/urdu/?p=580635
