اسلام آباد۔6مئی (اے پی پی):صدر مملکت آصف علی زرداری سے ایران کے وزیر خارجہ سید عباس عراقچی نے ملاقات کی جس میں دو طرفہ اور باہمی دلچسپی کے امور پر بات چیت کی گئی۔ملاقات میں علاقائی سلامتی کی صورتحال بالخصوص پہلگام واقعہ کے بعد بھارت اور پاکستان کے مابین جاری کشیدگی پر تبادلہ خیال کیا گیا۔
ایوان صدر کے پریس ونگ کے مطابق ملاقات کے دوران صدر مملکت آصف علی زرداری نے کہا کہ پاکستان اور ایران کے مابین تاریخی اور برادرانہ تعلقات ہیں۔صدر مملکت نےخطے میں امن اور خوشحالی کے فروغ کیلئے مل کر کام کرنے کی اہمیت پر زور دیا۔ ایرانی وزیر خارجہ نے کہا کہ سپریم لیڈر آیت اللہ سید علی خامنہ ای اور ایرانی صدر مسعود پیزشکیان کی ہدایات پر پاکستان کا دورہ کیا۔موجودہ صورتحال پر پاکستان کا موقف سمجھتے ہیں۔
ایرانی وزیر خارجہ کا کشیدگی کم کرنے کیلئے فریقین پر تحمل کا مظاہرہ کرنے پر زور دیا ۔ انہوں نے کہا کہ ایران پاکستان کے ساتھ تعلقات کو اہمیت دیتا ہے۔ایران پاکستان کے ساتھ باہمی مفاد میں دوطرفہ تعلقات مزید مضبوط بنانے کا خواہاں ہے۔ایرانی وزیر خارجہ کا دوطرفہ تجارت کو اس کی بھرپور صلاحیت تک بڑھانے کی ضرورت پر بھی زوردیا۔ملاقات میں افغانستان کی صورتحال پر بھی تبادلہ خیال کیا گیا.
ایرانی وزیر خارجہ نے خطے کے معاملات پر پاکستان کے ساتھ مل کر کام کرنے کی یقین دہانی کرائی۔صدر مملکت نے اہم موڑ پر دورہ پاکستان کرنے پر ایرانی وزیر خارجہ کا شکریہ ادا کیا. ان کا کہنا تھا ک بھارت کے جارحانہ اقدامات سے علاقائی امن و استحکام کو خطرہ ہے۔
صدر مملکت کا مذاکرات اور سفارت کاری کے لیے پاکستان کے عزم کا اعادہ کیا۔صدر مملکت نے دونوں ممالک کے باہمی مفاد میں ایران کے ساتھ تجارت کو فروغ دینے کی ضرورت پر بھی زوردیا۔ملاقات میں فریقین نے غزہ کی صورتحال پر بھی تبادلہ خیال کیا گیا۔
فریقین نے غزہ اور مغربی کنارے میں اسرائیلی افواج کی طرف سے جاری مظالم ، انسانی حقوق کی خلاف ورزیوں کی مذمت کی۔ایرانی وزیر خارجہ نےایرانی صدر کی جانب سے صدر آصف علی زرداری کے لیے نیک خواہشات کا بھی اظہارکیا۔
Short Link: https://urdu.app.com.pk/urdu/?p=593579
