اسلام آباد ۔ 22 جنوری (اے پی پی) صدر مملکت ڈاکٹر عارف علوی نے شاہی سعودی مسلح افواج کے چیف آف جنرل سٹاف فیاض بن حامد رقاد الرویلی کو نشان امتیاز ملٹری عطا کیا ہے۔ اس سلسلہ میں منگل کو ایوان صدر میں خصوصی تقریب منعقد ہوئی جس میں چیئرمین جوائنٹ چیفس آف سٹاف کمیٹی جنرل زبیر محمود حیات اور دیگر سینئر افسران نے شرکت کی۔ تقریب کے بعد سعودی مسلح افواج کے چیف آف جنرل سٹاف نے صدر مملکت سے ملاقات کی۔ اس موقع پر گفتگو کرتے ہوئے صدر مملکت نے کہا کہ پاکستان سعودی عرب سے برادرانہ اور منفرد تعلقات کو انتہائی اہمیت دیتا ہے جو باہمی اعتماد پر مبنی ہیں اور تمام شعبوں میں انہیں وسعت دینے کا خواہاں ہے۔ انہوں نے دونوں ممالک کے درمیان قریبی دفاعی تعاون پر اطمینان کا اظہار کیا جسے دفاعی پیداوار کے میدان میں فروغ دینے کے مزید امکانات موجود ہیں۔ انہوں نے دونوں ممالک کے درمیان تجارتی و سرمایہ کاری روابط کے فروغ کو اجاگر کرتے ہوئے کہا کہ پاکستانی تارکین وطن سعودی عرب کی ترقی اور خوشحالی میں شاندار خدمات انجام دے رہے ہیں اور وہ وژن 2030ءمنصوبوں پر عملدرآمد میں اہم کردار ادا کر سکتے ہیں۔ چیف آف جنرل سٹاف فیاض بن حامد رقاد الرویلی نے اعلیٰ فوجی اعزاز دینے پر صدر اور پاکستان کی حکومت کا شکریہ ادا کرتے ہوئے امید ظاہر کی کہ دونوں برادر ممالک کے درمیان دوطرفہ تعلقات مستقبل میں مزید پھلے پھولیں گے۔
