اسلام آباد ۔ 4 اگست (اے پی پی) صدر مملکت ڈاکٹر عارف علوی نے مصنوعی ذہانت کو بروئے کار لانے کی ضرورت پر زور دیتے ہوئے کہا ہے کہ ٹیکنالوجی کے فروغ سے ملک کو ترقی کی راہ پر گامزن کیا جا سکتا ہے، گورننس اور سائنس کے امتزاج سے ترقی ممکن ہے، زراعت پاکستان کی بنیاد ہے، اس شعبہ میں ڈرون ٹیکنالوجی کو استعمال میں لایا جائے، پاکستان نے موجودہ حکومت کی دانشمندانہ پالیسوں اور عوام کی جانب سے احتیاطی تدابیر پر عملدرآمد کے باعث کورونا وباء پر قابو پانے میں کامیابی حاصل کی ہے۔ ان خیالات کا اظہار انہوں نے منگل کو کامسٹیک یونیورسٹی میں مصنوعی ذہانت سے متعلق تقریب سے خطاب کرتے ہوئے کیا۔ صدر مملکت نے کہا کہ مصنوعی ذہانت کے باعث درست اعداد و شمار کو اکٹھا کرنے اور اس کے مطابق پالیسی سازی میں مدد ملتی ہے، مصنوعی ذہانت سے بروئے کار لانے سے زیادہ ڈیٹا کو اکٹھا کرنے کی صلاحیتوں میں اضافہ ہوتا ہے، پاکستان میں 20 کروڑ لوگوں کا ڈیٹا موجود ہے، یہ ڈیٹا نیا سونا اور تیل ہے، ہم اس ڈیٹا کے تجزیہ سے منصوبہ سازی کرکے متعدد اقدامات میں بہتری لا سکتے ہیں۔ انہوں نے کہا کہ چین نے ٹیکنالوجی کی بنیاد پر غربت ختم کی، ٹیکنالوجی کے میدان میں مصنوعی ذہانت ابھی نئی چیز ہے، ہمیں یہ جاننے کی ضرورت ہے کہ اس سے کن کن شعبوں میں استفادہ کیا جا سکتا ہے۔ انہوں نے کہا کہ اختراع کی چوری کا خطرہ ہوتا ہے اس کو روکنے کیلئے کئی اقدامات کئے جاتے ہیں، ہم سوچ سمجھ کر اور باریک بینی سے تجزیہ کرکے فیصلہ کرتے ہیں۔ صدر مملکت نے کہا کہ گورننس اور سائنس کا امتزاج ہو گا، ملک ترقی کرے گا، دنیا میں جن قوموں نے بروقت فیصلے کئے انہوں نے کامیابی حاصل کی، چین نے بروقت فیصلوں کے باعث ترقی کی، پاکستان کی بنیاد زراعت ہے، ہمیں اس شعبہ میں ڈرونز ٹیکنالوجی کو بروئے کار لانے کی ضرورت ہے جس سے زرعی شعبہ میں انقلاب آئے گا۔ انہوں نے کہا کہ مصنوعی ذہانت سے انسانی وسائل کی ترقی کیلئے بھی استفادہ کیا جا سکتا ہے، ہمارے نوجوان ہمارا مستقبل ہیں، نوجوان اس شعبہ میں تعلیم حاصل کرکے ملکی ترقی میں اہم کردار ادا کر سکتے ہیں۔ انہوں نے کہا کہ خواتین کا ملکی ترقی میں اہم کردار ہے، خواتین سافٹ ویئر ٹیکنالوجی کے ذریعے ملکی ترقی میں اہم کردار ادا کر سکتی ہیں، خواتین ڈاکٹرز بھی ٹیکنالوجی کے ذریعے گھر میں بیٹھ کر اپنی خدمات سرانجام دے سکتی ہیں اس سے خواتین کو بااختیار بنانے میں مدد ملے گی۔ انہوں نے کہا کہ پاکستان کورونا سے محفوظ ملک ہے، کورونا سے بچائو کیلئے حکومت نے دانشمندانہ پالیسیاں تشکیل دیں جبکہ پاکستانیوں نے ذمہ دار قوم ہونے کا ثبوت دیتے ہوئے کورونا سے بچائو کے ضابطہ کار پر عمل کیا۔ انہوں نے کہا کہ احساس پروگرام کے ذریعے میرٹ اور شفافیت پر مبنی طریقہ کار کے تحت نادار افراد میں رقوم تقسیم کرکے شاندار کام کیا گیا، ہم نے کورونا سے بچائو کے ساتھ ساتھ عبادات کی ادائیگی کیلئے بھی ایس او پیز وضع کئے، ہم نے دنیا کو بتایا کہ ہم کسی سے کم نہیں بلکہ ہمارا قوموں میں اہم مقام ہے۔ انہوں نے کہا کہ ملک درست سمت میں گامزن ہے، تمام شعبوں میں نمایاں بہتری آ رہی ہے۔ اس موقع پر وفاقی وزیر برائے سائنس و ٹیکنالوجی فواد حسین چوہدری اور وفاقی وزیر برائے انسداد منشیات اعظم سواتی بھی موجود تھے۔
