کراچی ۔2جنوری (اے پی پی):صدر ڈاکٹر عارف علوی نے کہا ہے کہ افراد باہم معذوری کو معاشرے کا حصہ بنانے اور مارکیٹ میں ملازمت کے قابل بنانے کے لئے ضروری تکنیکی مہارت اور استعداد کار بڑھانے کے لئے اقدامات کیے جا رہے ہیں۔ انہوں نے کہا کہ ہمیں خصوصی افراد کو خیرات کے بجائے حقوق دینے کی ضرورت ہے۔ صدر نے ان خیالات کا اظہار ہفتہ کو سندھ بزنس چیمبر کے ممبران کے ساتھ ایک اجلاس میں بات چیت کرتے ہوئے کیا۔ صدر مملکت نے کہا کہ برآمدی صنعتوں کے لئے خام مال پیدا کرنے والی صنعتوں کو بھی شامل کرنے کی ضرورت ہے ، تاکہ انہیں ترجیحی بنیادوں پر توانائی فراہم کی جاسکے۔ انہوں نے کہا کہ گیس کی فراہمی کے مسئلے کو حل کرنے تک ایل این جی مکس بھی استعمال کیا جانا چاہئے۔ انہوں نے خصوصی افراد کو ضروری مہارت فراہم کرنے اور انہیں صنعت کے مختلف شعبوں میں روزگار کے مواقع کے قابل بنانے کے لئے تربیتی مراکز کے ساتھ روابط بڑھانے کی ضرورت پر بھی زور دیا۔ صدر کو بتایا گیا کہ کراچی ایسوسی ایشن آف ٹریڈ اینڈ انڈسٹری (کٹی) ہنر فاؤنڈیشن کے ساتھ خصوصی افراد کے لئے خصوصی ٹیکنیکل کورسز تیار کرنے کے لئے تعاون کر رہی ہے تاکہ انہیں ملازمت کے قابل بنایا جاسکے۔ اس موقع پر خاتون اول بیگم ثمینہ عارف نے کہا کہ وہ اس سلسلے میں تجارت اور صنعت کے مختلف چیمبرز کا بھی دورہ کریں گی۔ کاروباری وفد میں شارق وہرا صدر کے سی سی آئی ، جناب سلیم الزماں صدر کٹی ، جناب عبد الہادی صدر سائٹ (SITE) اور دیگر شامل تھے۔\
