کوئٹہ۔ 29 اپریل (اے پی پی):صوبائی الیکشن کمشنر علی اصغر سیال نے حب کا دورہ کیا، اور ضلعی الیکشن کمیشن آفس اور پیرکس روڈ پر زیر تعمیر نئی بلڈنگ کا معائنہ کیا۔ دورے کے آغاز میں صوبائی الیکشن کمشنر نے ڈسٹرکٹ الیکشن کمیشن آفس کا دورہ کیا، جہاں ڈسٹرکٹ الیکشن آفیسرعبدالمقتدر غزالی نے انہیں دفتر کے امور اور انتظامی معاملات پر الگ سے تفصیلی بریفنگ دی۔اس موقع پر ڈپٹی کمشنر حب نثار احمد لانگو بھی موجود تھے۔بعد ازاں علی اصغر سیال نے پیرکس روڈ پر جاری نئی بلڈنگ کے تعمیراتی کام کا جائزہ لیا۔
متعلقہ افسران نے انہیں تعمیراتی پیش رفت کے حوالے سے بریفنگ دی۔ صوبائی الیکشن کمشنر نے کام کے معیار پر اطمینان کا اظہار کرتے ہوئے کام کی رفتار مزید تیز کرنے کی ہدایت دی۔اس موقع پر گفتگو کرتے ہوئے علی اصغر سیال نے کہا کہ الیکشن کمیشن کا وژن ہے کہ تمام دفاتر الیکشن کمیشن کی اپنی ملکیت میں ہوں۔ انہوں نے کہا کہ نئی بلڈنگ میں منتقلی کے بعد الیکشن کمیشن اپنی قومی ذمہ داریاں بہتر اور موثر انداز میں نبھا سکے گا۔انہوں نے کہا کہ نئی عمارت میں جدید ٹیکنالوجی کی سہولیات دستیاب ہوں گی، جس سے دفتری امور مزید تیز اور شفاف انداز میں انجام دیے جا سکیں گے۔
Short Link: https://urdu.app.com.pk/urdu/?p=589467