پشاور۔ 14 مارچ (اے پی پی):خیبرپختونخوا حکومت نے مالی نظم و نسق کو یقینی بنانے، سروس ڈیلیوری کی بہتری اور مالی معاملات میں شفافیت کیلئے ایک اور سنگ میل عبور کر لیا۔صوبائی حکومت کے تمام سرکاری محکموں اور اداروں کے لیے انٹگریٹڈ آئی ٹی پورٹل کا اجراءکر دیا گیا۔ اس سلسلے میں گزشتہ روز وزیر اعلیٰ ہاوس پشاور میں تقریب کا انعقاد کیا گیا جس میں وزیر اعلیٰ خیبرپختونخوا علی امین خان گنڈاپور نے تقریب کے مہمان خصوصی کی حیثیت سے پورٹل کا باضابطہ اجراءکیا۔ وزیر اعلیٰ کے مشیر برائے خزانہ مزمل اسلم، متعلقہ محکموں کے اعلی حکام اور معاون اداروں کے نمائندگان نے تقریب میں شرکت کی۔
یہ پورٹل سب نیشنل گورننس پروگرام کے تکنیکی تعاون سے تیار کیا گیا ہے۔ مختلف صوبائی محکموں کے تحت مجموعی طور پر 183 ادارے کام کر رہے ہیں جن میں خود مختار ، نیم خودمختار ادارے، جامعات، تدریسی ہسپتال، میونسپل ادارے اور دیگر شامل ہیں۔ ان تمام اداروں کی کارکردگی اور مالی نظم ونسق کو بہتر بنانے کیلئے انٹگریٹڈ انفارمیشن پورٹل تیار کیا گیا ہے۔ خیبر پختونخوا اس طرح کا پورٹل متعارف کروانے والا ملک کا پہلا صوبہ ہے۔ اس پورٹل کے اجراءکے بعد صوبائی حکومت کے ان تمام اداروں کے لیے اس پورٹل کا استعمال لازمی ہو گا۔ یہ پورٹل مالیاتی کارکردگی کے اشاریے، انٹرایکٹو ڈیش بورڈز اور خود کار رپورٹنگ کے نظام پر مشتمل ہے۔
یہ پورٹل صوبائی حکومت کو فیصلہ سازی، مانیٹرنگ اور اور موثر مالی نظم و ضبط کے نفاذ میں مدد دے گا۔ تقریب میں سرکاری اداروں کی سروس ڈیلیوری پرفارمینس مانیٹرنگ رپورٹ بھی پیش کی گئی۔ یہ صوبے میں اپنی نوعیت کی پہلی مانیٹرنگ رپورٹ ہے جو سب نیشنل گورننس پروگرام کے تعاون سے تیار کی گئی ہے۔ یہ مانیٹرنگ فریم ورک بطور پائلٹ پراجیکٹ تین محکموں سے شروع کیا گیا تھا،اب اس مانیٹرنگ فریم ورک کو تمام سرکاری محکموں تک توسیع دی گئی ہے۔
یہ مانیٹرنگ رپورٹ بنیادی پالیسی دستاویز کی حیثیت رکھتی ہے جو سرکاری اداروں میں شفافیت اور جوابدہی کے عمل کو فروغ دے گی۔ وزیر اعلیٰ خیبرپختونخوا علی امین گنڈاپور نے تقریب سے خطاب کرتے ہوئے متعلقہ حکام کو پورٹل کے اجراءاور سروس ڈیلیوری مانیٹرنگ رپورٹ کی تیاری پر مبارکباد دی اور تمام اداروں کو نئے تیار کیے گئے انٹیگریٹڈ انفارمیشن پورٹل کا استعمال یقینی بنانے کی ہدایت کی ہے۔
انہوں نے واضح کیا کہ رواں سال یکم جولائی تک تمام ادارے پورٹل کا استعمال یقینی بنائیں، بصورت دیگر ان کے خلاف کاروائی ہو گی۔ وزیر اعلیٰ کا کہنا تھا کہ ہم جس جدت کی طرف ابھی جا رہے ہیں، بہت پہلے جانا چاہیے تھا، ہم جدید ٹیکنالوجی پر مبنی اصلاحات کے نفاذ کے بغیر جدید چیلنجز کا مقابلہ نہیں کر سکتے۔ وزیر اعلیٰ نے کہا ‘ہم نے حکومت میں آتے ہی اس پر کام شروع کیا،
ایک سال کے مختصر وقت میں خاطر خواہ پیش رفت یقینی بنائی گئی ہے اور مختلف محکموں میں ڈیجیٹائزیشن پر مبنی متعدد اقدامات کا اجراءکر دیا گیا ہے، علی امین گنڈاپور نے کہا کہ تمام سرکاری محکموں اور اداروں پر لازم ہے کہ وہ نئی اصلاحات پر عمل درآمد یقینی بنائیں۔اصل مقصد خدمات کی فراہمی کے عمل کو بہتر بنانا اور صوبے کو اپنے پاؤں پر کھڑا کرنا ہے۔ علی امین گنڈاپور نے صوبائی حکومت کی کارکردگی کا حوالہ دیتے ہوئے کہا کہ صوبائی حکومت نے بہتر مالی نظم ونسق کی بدولت 169 ارب روپے کا سرپلس بجٹ پیش کیا،
تیس ارب روپے کے ابتدائی فنڈ سے ڈیٹ مینجمنٹ فنڈ قائم کیا جس کو ڈیڑھ سو ارب تک لے جانے کا ارادہ ہے، اس کے علاوہ صحت کارڈ بحال کیا، دیگر فلاحی پروگراموں کا فنڈ ڈبل کر دیا اور تعلیمی وظائف کے فنڈز میں بھی اضافہ کیا گیا۔ وزیر اعلیٰ نے کہا کہ یہ تمام پیسہ صوبے میں موجود تھا مگر ادھر ادھر جا رہا تھا،
ہم نے بہتر مالی نظم و نسق اور مانیٹرنگ کے ذریعے اسی پیسے کو صوبے اور عوام کی بہتری کے لیے استعمال کیا۔ تقریب سے وزیر اعلی کے مشیر برائے خزانہ مزمل اسلم اور سیکرٹری خزانہ عامر سلطان ترین کے علاوہ بین الاقوامی معاون اداروں کے حکام نے بھی خطاب کیا۔
Short Link: https://urdu.app.com.pk/urdu/?p=572724
