لاہور۔22اپریل (اے پی پی):صوبائی وزیر محکمہ صحت و ایمرجنسی سروسز پنجاب خواجہ سلمان رفیق نے پارلیمانی سیکرٹری ضیااللہ شاہ کے ہمراہ ایئر ایمبولینس سروس کا جائزہ کیلئے لاہورائیر پورٹ کا دورہ کیا۔سیکرٹری محکمہ ایمرجنسی سروسز پنجاب ڈاکٹر رضوان نصیر بھی اس موقع پر موجود تھے۔صوبائی وزیر و پارلیمانی سیکرٹری نے ایئر ایمبولینس سروس پر متعین عملہ سے ملاقات کی۔
ایئر ایمبولینس سروس کی اہمیت پر ایئرایگل اکیڈمی میں ایک جامع پریزینٹیشن بھی پیش کی گئی۔اس موقع پر ایئر کرافٹس کا بھی جائزہ لیا گیا۔صوبائی وزیر خواجہ سلمان رفیق نے کہاکہ وزیر اعلی پنجاب کے ویژن کے مطابق ایئر ایمبولینس سروس کامیابی سے جاری ہے۔
الحمدللہ اب تک 124 شدید علیل و زخمی مریضوں کو دور دراز کے علاقوں سے منتقل کیا جا چکا ہے۔72 مریضوں کو بہاولنگر، 42 کو میانوالی، 2 کو رحیم یار خان جبکہ بہاولپور، پارا چنار، لاہور، کراچی، فیصل آباد اور راولپنڈی سے ایک ایک مریض کو منتقل کیا گیا ہے۔ اب تک 103 کارڈیالوجی، 12 سپائنل انجری، 2 ہیڈ انجری اور 7 دوسرے علیل مریضوں کو منتقل کیا گیا ہے۔
انہوں نے کہاکہ گذشتہ پندرہ سال سے شعبہ صحت کی بہتری کیلئے کام کر رہا ہوں۔اللہ تعالی نے ہمیں دکھی انسانیت کی خدمت کرنے کا نادر موقع فراہم کیا ہے۔ فورٹ عباس میں بھی سروسز کو بڑھائیں گے۔ وزیر اعلی پنجاب بھکر اور بہاول نگر میں ہوائی اڈے بنانے کا پہلے ہی اعلان کر چکی ہیں۔دور دراز علاقوں سے مریضوں کو شفٹ کرنے والے ریسکیو عملہ کو خراجِ تحسین پیش کرتے ہیں۔
صوبائی وزیرصحت نے کہاکہ ایئر ایمبولینس سروس اپنی نوعیت کی شروع کی جانے والی پاکستان کی پہلی سروس ہے۔ ائیر ایمبولینس سروس عوام کیلئے آسانیاں پیدا کر رہی ہے۔ پنجاب ایئر ایمبولینس سروس کا ہدف دور دراز علاقوں کے مریضوں کو فوری جدید طبی سہولیات فراہم کرنا ہے۔ انہوںنے کہاکہ حکومت پنجاب کی ایئر ایمبولینس سروس فوری طبی امداد کے لئے ایک انقلابی قدم ثابت ہو رہی ہے۔ ایئر ایمبولینس سروس حکومت پنجاب کا فلیگ شپ پروگرام ہے۔پارلیمانی سیکرٹری ضیااللہ شاہ نے کہاکہ ریسکیو عملہ الحمدللہ عوام کو ایمرجنسی کی بین الاقوامی معیار کی سروسز فراہم کر رہا ہے۔
سیکرٹری محکمہ ایمرجنسی سروسز پنجاب نے کہاکہ خواجہ سلمان رفیق کی قیادت میں ایئر ایمبولینس سروس کے چیلنج کو قبول کرنے کے بعد ہدف کو حاصل کر کے دکھایا ہے۔ ایئر ایمبولینس سروس کا دائرہ کار وسیع کیا جا رہا ہے۔ اس کاوش میں شاہین فاؤنڈیشن و دیگر کی کاوشوں کو سراہتے ہیں۔ ریٹائرڈ ایئر کموڈور خالد چیمہ نے کہاکہ عوام کے بہترین فلاحی منصوبے ایئر ایمبولینس سروس کی کامیابی کیلئے محکمہ ایمرجنسی سروسز پنجاب کے ساتھ ہر ممکن تعاون کریں گے۔
Short Link: https://urdu.app.com.pk/urdu/?p=585927
