اسلام آباد۔18مئی (اے پی پی):چیئرمین سی ڈی اے، چیف کمشنر اسلام آباد اور ڈائریکٹر جنرل سول ڈیفنس محمد علی رندھاوا نے کہا ہے کہ محکمہ سول ڈیفنس نے سی ڈی اے اور فیڈرل ڈائریکٹوریٹ آف ایجوکیشن کے اشتراک سے اسلام آباد کے اسکولوں اور کالجوں کے طلباء کو ہنگامی حالات و صورتحال اور قدرتی آفات کے دوران جانی و مالی نقصان سے بچاؤ کیلئے اقدامات سکھانے کے مقصد سے تربیت کا پہلا مرحلہ مکمل کر لیا ۔
اتوار کو سی ڈی اے کی جانب سے جاری بیان کے مطابق چیئرمین سی ڈی اے، چیف کمشنر اسلام آباد اور ڈائریکٹر جنرل سول ڈیفنس محمد علی رندھاوا نے ایک اجلاس کی صدارت کی جس میں انہیں تفصیلی بریفنگ دی گئی کہ محکمہ سول ڈیفنس اسلام آباد نے سی ڈی اے اور فیڈرل ڈائریکٹوریٹ آف ایجوکیشن کے اشتراک سے دارالحکومت کے طلباء کے اسکولوں اور کالجوں کیلئے سہ روزہ سول ڈیفنس کی تربیتی پروگرام کا پہلا مرحلہ کامیابی سے مکمل کرلیا گیا ہے جو ایک منفرد تربیتی پروگرام تھا جسکے ذریعے طلباء کو حفاظت اور مضبوطی کی علامت بننے کیلئے بااختیار بنایا گیا۔محکمہ سول ڈیفنس کی چھ ماہر تربیتی ٹیموں اور سی ڈی اے کی چار ٹیموں نے 70 لڑکوں کے اسکولوں اور کالجوں کے سات ہزار (7000) طلباء میں علم اور مہارت کی شمع روشن کی، انہیں اپنے معاشروں کو محفوظ بنانے کیلئے شہری دفاع کی بنیادی صلاحیتوں سے آراستہ کیا۔
محمد علی رندھاوا نے کہا ہے کہ تربیت ہمیشہ سے ایک مفید طریقہ کار ہے جو مسلسل سیکھنے اور صلاحیتوں کو نکھارنے کا ذریعہ بنتی ہے جس سے علم میں اضافہ اور مجموعی کامیابی اور کارکردگی کو بہتر سے بہترین بنانے میں مدد ملتی ہے۔
ڈائریکٹر جنرل سول ڈیفنس محمد علی رندھاوا نے تربیتی ٹیموں کی مشترکہ کاوشوں کو سراہتے ہوئے انکی مہارت، غیر معمولی کارکردگی، لگن اور عزم کی تعریف کی جو ہنگامی حالات میں بروقت جانی و مالی نقصان سے بچاؤ کیلئے احتیاطی اور فوری ردعمل کی حکمت عملیوں پر مرکوز ہیں۔
علاوہ ازیں ڈائریکٹر جنرل سول ڈیفنس محمد علی رندھاوا نے ہدایت کی کہ سول ڈیفنس کی تربیت کو ایک مستقل پروگرام کے طور پر نافذ کیا جائے جس کے تحت اسلام آباد کی لڑکیوں کے اسکولوں، کالجوں اور یونیورسٹیوں کیلئے بھی اسی طرح کے تربیتی پروگرامز کا آغاز کیا جائے تاکہ ملک بھر بشمول وفاقی دارالحکومت میں تیاری اور حفاظت کے کلچر کو فروغ دیا جاسکے۔
Short Link: https://urdu.app.com.pk/urdu/?p=598418
