عالمی یوم تعلیم کے موقع پر "احساس تعلیمی وظائف” اینڈرائیڈ ایپ کا اجراء

اسلام آباد۔24جنوری (اے پی پی):تعلیم کا عالمی دن ہر سال 24 جنوری کو عالمی سطح پر منایا جاتا ہے۔ اس دن وزیراعظم کی معاون خصوصی سینیٹر ڈاکٹر ثانیہ نشتر نے احساس تعلیمی وظائف ایپلی کیشن کا باقاعدہ آغاز کرنے کے لئے اسلام آباد کے مضافات میں اسلام آباد گورنمنٹ ماڈل کالج فار گرلز کوٹ ہتھیال کا دورہ کیا۔ "احساس تعلیمی وظائف” اینڈرائیڈ ایپلی کیشن کو خاص طور پر تیار کیا گیا ہے تاکہ احساس اہل خاندانوں کے بچوں کاان کے گھروں کی دہلیز پر سکولوں میں اندراج ممکن بنایا جا سکے۔

تخفیف غربت و سماجی تحفظ ڈویژن کے مطابق تقریب کے دوران ڈاکٹر ثانیہ نشتر نے خود ایک بچی کو اسکول کے وظیفہ پروگرام میں شامل کیا۔ انہوں نے بچوں، ماؤں اور اساتذہ کے ساتھ بیٹھی اور نئی متعارف کرائی گئی اینڈرائیڈ ایپ کے ذریعے ڈیجیٹل اندراج کے عمل کے بارے میں رہنمائی فراہم کی۔

ڈاکٹر ثانیہ نشتر نے میڈیا سے بات کرتے ہوئے کہا، "تعلیم غریب ترین خاندانوں کو غربت سے باہر نکلنے اور خوشحالی کا راستہ فراہم کرتی ہے۔ یہی وجہ ہے کہ احساس اپنے سکول وظیفہ پروگرام کے ذریعے غریب ترین خاندانوں کی تعلیم تک رسائی کو بہتر بنانے پر توجہ مرکوز کر رہا ہے۔ پروگرام کے تحت لوگوں کو اپنے بچوں کا خود اندراج کروانے کی سہولت فراہم کرتے ہوئے، ہم نے آج ایپ بھی متعارف کرائی ہے۔

اس ایپ کا استعمال کرتے ہوئے، خاندان اپنے بچوں کو کسی دفتر میں جائے بغیر خود سکولوں میں انداراج کرا سکتے ہیں۔احساس تعلیمی وظائف پروگرام آئندہ3 سالوں میں پاکستان کے 160 اضلاع سے 10 ملین مستحق بچوں کو اپنے دائرے میں شامل کرنے کا ارادہ رکھتا ہے۔ اب تک، 6.7 ملین سے زائد بچوں کا اندراج ہوچکا ہے۔

احساس تعلیمی وظائف پروگرام کے دو مقاصد ہیں: غریب گھرانوں کی مالی معاونت کرنا اور اسکول نہ جانے والے بچوں کی تعداد کو کم کرنا۔ اس وقت پاکستان میں 18.7 ملین بچے اسکولوں سے باہر ہیں۔احساس پالیسی کے مطابق احساس تعلیمی وظائف لڑکیوں کو لڑکوں کے مقابلے میں زیادہ وظیفہ فراہم کیا جاتا ہے۔

احساس ایکو سسٹم میں اہل خاندانوں کے 4-22 سال کی عمر کے بچوں کو پرائمری سے لے کر ہائیر سیکنڈری سطح تک وظیفہ دیا جاتا ہے۔ یہ پروگرام والدین کی حوصلہ افزائی کرتا ہے کہ وہ اپنے بچوں بالخصوص لڑکیوں کو سکول بھیجیں۔ تمام ادائیگیاں بچوں کی تسلی بخش اسکول/کالج حاضری سے منسلک ہیں۔

ڈاکٹر ثانیہ نے کہاکہ ہماری حکومت نے پانچویں جماعت مکمل کرنے والی لڑکیوں کے لیے احساس گریجویشن بونس بھی متعارف کرایا ہے تاکہ لڑکیوں کے سکول چھوڑنے کے مسئلے کو حل کیا جا سکے۔آج احساس "پاکستان میں انسانی سرمائے کی ترقی کو بہتر بنانے میں مشروط مالی معاونت کے کردار” کے موضوع پر ایک پینل مباحثے کی میزبانی بھی کر رہا ہے۔ ورچوئل ایونٹ میں برطانوی ہائی کمشنر پاکستان ڈاکٹر کرسچن ٹرنر ، ناجی بہہسین، کنٹری ڈائریکٹر، ورلڈ بینک؛ یونگ یی، کنٹری ڈائریکٹر، ایشیائی ترقیاتی بینک؛ Aida Girma – ملکی نمائندہ، UNICEF؛ اور ڈائریکٹر جنرل احساس مشروط مالی معاونت، نوید اکبر شرکت کریں گے۔

اس سال کا تعلیم کا عالمی دن ان اہم ترین تبدیلیوں کو ظاہر کرنے کا ایک پلیٹ فارم ہے جن میں ہر کسی کے تعلیم کے بنیادی حق کا ادراک کرنے اور زیادہ پائیدار، جامع اور پرامن مستقبل کی تعمیر کے لئے پروان چڑھانا شامل ہے۔

Short Link: https://urdu.app.com.pk/urdu/?p=292165