عمران نیازی نے اعتراف کرلیا ہے کہ وہ ملک میں مارشل لاء لگوانا چاہتے ہیں، مریم اورنگزیب

اسلام آباد۔31اکتوبر (اے پی پی):وفاقی وزیر اطلاعات و نشریات مریم اورنگزیب نے کہا ہے کہ عمران خان نے اعتراف کرلیا ہے کہ وہ ملک میں مارشل لاء لگوانا چاہتے ہیں، وہ کھلے عام افواج پاکستان کو حکومت ختم کرنے اور سیاست میں مداخلت کی دعوت دے رہے ہیں۔ پیر کو پی ٹی آئی چیئرمین عمران خان کے بیان پر ردعمل میں انہوں نے کہا کہ ایک طرف ادب، دوسری طرف گالی، دماغ کی خرابی اور فرسٹریشن ہے، دو ہزار لوگ 22 کروڑ عوام نہیں ہوتے۔

انہوں نے کہا کہ عمران خان نے اعتراف کرلیا ہے کہ وہ ملک میں بلڈ شیڈ سے انقلاب لانا چاہتے ہیں۔ انہوں نے سوال کیا کہ بندوق سے انقلاب لانے کا ماسٹر مائنڈ کسے دھمکیاں دے رہا ہے؟ وفاقی وزیر اطلاعات نے کہا کہ فارن فنڈڈ فتنے اور توشہ خانہ چور کے مقدر میں ذلت اور رسوائی لکھی جا چکی ہے۔

انہوں نے کہا کہ ڈی جی آئی ایس پی آر اور ڈی جی آئی ایس آئی نے کہا تھا کہ ہم غیر ضروری سچ نہیں بولنا چاہتے، ذلت اب صرف فارن فنڈڈ فتنہ کی ہوگی جس نے آرمی چیف کو اپنا اقتدار بچانے کے لئے تاحیات توسیع دینے کی پیشکش کی۔ انہوں نے کہا کہ کس کے کہنے پر فارن فنڈڈ فتنے نے پورے پاکستان کو چور بنا دیا؟ انہوں نے کہا کہ فارن فنڈڈ فتنہ بہت بزدل شخص ہے جو صرف بھڑکیں مار رہا ہے۔

Short Link: https://urdu.app.com.pk/urdu/?p=335309