اسلام آباد ۔ 5 اکتوبر (اے پی پی)وزیراعظم عمران خان نے کہا ہے کہ قوم کے شاندار مستقبل کے معماروں کو خراج تحسین پیش کرتے ہیں، اساتذہ علم کی شمع جلانے اور نوجوان نسل کے اعلیٰ کردار کی تشکیل کیلئے کوشاں ہیں، اساتذہ کی قدرومنزلت کو یقینی بنانا نیا پاکستان کی ترجیحات میں شامل ہے۔اتوار کو اساتذہ کے عالمی دن کے موقع پر وزیر اعظم عمران خان نے اپنے پیغام میں کہا کہ اساتذہ کے عالمی دن کے موقع پر میں ان تمام عظیم ہستیوں کو خراج تحسین پیش کرتا ہوں جو قوم کے شاندار مستقبل کے معمار کہلاتے ہیں۔ انہوں نے کہا کہ میں اساتذہ کے عالمی دن کے موقع پر اس مقدس پیشے سے وابستہ تمام افراد کی خدمات کو خراج تحسین پیش کرتا ہوں جو علم کی شمع جلا نے اور نوجوان نسل کے اعلی کردار کی تشکیل کے لیے کوشاں ہیں، اس موقع پر میں اپنے تمام اساتذہ کو بھی خصوصی طور پر خراج تحسین پیش کرتا ہوں۔ انہوں نے کہا کہ اساتذہ قوم کے محسن ہیں جو کامیابی و کامرانی کے حصول میں سیڑھی کا کردار ادا کرتے ہیں،پیغمبری پیشے سے وابستہ ہونا بذات خود ایک بڑا اعزاز ہے، اساتذہ کی قدرومنزلت کو یقینی بنانا نیا پاکستان کی ترجیحات میں شامل ہے۔
