فیصل آباد۔ 26 ستمبر (اے پی پی):ڈیٹ پام ریسرچ انسٹی ٹیوٹ ایوب زرعی تحقیقاتی ادارہ فیصل آباد کے ماہرین اثمارنے کہاکہ باغبان کھجور کے پودوں سے زیر بچے علیحدہ کرنے کا عمل شروع کر دیں جبکہ شکری،کڑ، ڈھیڈی، شامران، عیدل شاہ،سفیدہ، خضراوی،مکران،حلاوی، اصیل،زاہدی، کپڑا، ہیمن،بسرا، فصلی، تاروالی، ماکھی اور حلینی اقسام کی کاشت سے کھجور کی بمپر کراپ حاصل ہو سکتی ہے۔
ایک بیان میں انہوں نے کہاکہ پنجاب میں ضلع جھنگ، مظفر گڑھ، ڈی جی خان اور بہاولپور سمیت بعض دیگر شہروں میں کھجور کی اچھی پیداوار حاصل ہوتی ہے،ان علاقوں میں کھجور کے پودوں سے زیر بچے الگ کرنے کاعمل 20 ستمبر سے شروع کرکے 15 اکتوبر تک مکمل کیاجاسکتاہے۔
انہوں نے کہاکہ باغبان پودے لگانے سے 10،15 روز قبل تین مربع فٹ کے گڑھے بنا کر بھل سے بھر دیں اور اسے پانی بھی لگا دیں۔ان کا کہنا تھا کہ پودا لگاتے وقت دیمک سے بچاؤ کےلئے مناسب دوائی بھی استعمال کی جائے اوراس امر کا خیال رکھاجائے کہ زیر بچے کاوزن 15کلو گرام سے زائد نہیں ہوناچاہیے۔
Short Link: https://urdu.app.com.pk/urdu/?p=505723
