اسلام آباد۔3ستمبر (اے پی پی):ملک میں فرنس آئل کی فروخت میں جاری مالی سال کے پہلے دو ماہ میں سالانہ بنیادوں پر 76 فیصد کی کمی ریکارڈ کی گئی ہے۔ او سی اے سی اور انڈسٹری کے اعدادوشمار کے مطابق مالی سال کے پہلے دو ماہ (جولائی اگست) میں ملک میں 0.03 ملین ٹن فرنس آئل کی فروخت ریکارڈ کی گئی جو گزشتہ مالی سال کی اسی مدت کے مقابلے میں 76 فیصد کم ہے۔
گزشتہ مالی سال کی اسی مدت میں ملک میں 0.14 ملین ٹن فرنس آئل کی فروخت ریکارڈ کی گئی تھی۔ اگست میں ملک میں 0.02 ملین ٹن فرنس آئل کی فروخت ریکارڈ کی گئی جو گزشتہ سال اگست کے مقابلے میں 71 فیصد کم ہے ۔ گزشتہ سال اگست میں ملک میں 0.06 ملین ٹن فرنس آئل کی فروخت ریکارڈ کی گئی تھی ۔
جولائی کے مقابلے میں اگست میں فرنس آئل کی فروخت میں ماہانہ بنیادوں پر 21 فیصد اضافہ ریکارڈ کیا گیا ہے۔ واضح رہے کہ مالی سال کے پہلے دو ماہ میں ملک میں 2.52 ملین ٹن پٹرولیم مصنوعات کی فروخت ریکارڈ کی گئی ہے جو گزشتہ مالی سال کی اسی مدت کے 2.41 ملین ٹن کے مقابلے میں 5 فیصد زیادہ ہے۔
