فیصل آباد ۔ 29 اگست (اے پی پی):زرعی ماہرین نے کاشتکاروں کوموسم گرما کی سبزیوں کی اگیتی دستیابی اور زیادہ پیداوار کے حصول کے لیے ٹنل کے طریقہ کاشت کو فروغ دینے کی ہدایت کی ہے ۔
ریسرچ انفارمیشن یونٹ ایوب زرعی تحقیقاتی ادارہ فیصل آباد کے ماہرین سبزیات نے کہا ہے کہ چونکہ پنجاب میں دسمبر اور جنوری میں درجہ حرارت کم ہونے اور کورا پڑنے کی وجہ سے موسم گرما کی اگیتی سبزیاں کھیت میں اگانا ممکن نہیں لہٰذاموسم گرما کی سبزیوں کی اگیتی دستیابی کے لیے ٹنل کے طریقہ کاشت کو رواج دیا گیا ہے کیونکہ ٹنل میں کاشت کی گئی سبزیاں فی ایکڑ تعداد میں زیادہ ہوتی ہیں ۔انہوں روایتی طریقہ کاشت کی نسبت بلند، واک ان ٹنل اور پست ٹنل میں کھیرا، ٹماٹر، شملہ مرچ، سبز مرچ، گھیا کدو، گھیا توری، کریلا، چپن کدو، حلوہ کدو، بینگن، تربوز اور خربوزہ کی سبزیاں کامیابی سے اگائی جارہی ہیں۔
انہوں نے کہاکہ ان ٹنل کے اندر کاشت کی گئی سبزیوں کو شدید سردیوں کے موسم میں انتہائی نگہداشت کے لیے پلاسٹک شیٹ سے ڈھانپ دیا جاتا ہے جس سے ٹنل کے اندر کا درجہ حرارت مناسب رہتا ہے۔انہوں نے کہاکہ شدید سردی اور کورے کے باوجود ان سبزیوں کے پودوں کی بڑھوتری جاری رہتی ہے جس کے باعث یہ جلد تیار اور اچھے داموں میں فروخت ہوتی ہیں جس سے کاشتکاروں کو زیادہ منافع حاصل ہوتا ہے۔
انہوں نے نوجوان کاشتکاروں کو سفارش کی کہ وہ ٹنل فارمنگ کی عملی تربیت حاصل کریں۔انہوں نے ٹنل کے کاشتکاروں کو سفارش کی کہ وہ ٹماٹر، شملہ مرچ، سبزمرچ اور بینگن کی نرسری کی کاشت ستمبر کے آخر تک اور کھیرا،گھیا کدو، گھیا توری، کریلہ، حلوہ کدو، چپن کدو، خربوزہ اور تربوز کی براہ راست کاشت نومبر کے آخرتک مکمل کرلیں۔
Short Link: https://urdu.app.com.pk/urdu/?p=383912
