اسلام آباد۔18نومبر (اے پی پی):خوبصورت لب ولہجے کے ترقی پسند شاعر فیض احمد فیض کی برسی20نومبر (بدھ )کو منائی جائے گی۔فیض احمد فیض13 فروری 1911 کوسیالکوٹ میں پیدا ہوئے تھے۔انہوں نے اردو کو بین الاقوامی سطح پر روشناس کرایا ، فیض احمد فیض کی نمایاں تصا نیف میں نقش فریادی، دست صبا، زنداں نامہ، دست تہ سنگ، سروادی سینا، شام شہریاراں اور مرے دل مرے مسافر کے شعری مجموعے شامل ہیں۔
اس کے علاوہ انہوں نے نثر میں میزان، صلیبیں ،مرے دریچے میں، متاع لوح و قلم، ہماری قومی ثقافت اور مہ و سال اور آشنائی جیسی کتب چھوڑی ہیں ۔فیض احمد فیض ایشیا کے واحد شاعر ہیں جن کو روس کی جانب سے لینن امن ایوارڈ سے بھی نوازا گیا۔ اس کے علاوہ فیض احمد فیض کو لوٹس ایوارڈ برائے ادب ،نگار ایوارڈ اور نشان امتیاز سے بھی نوازا گیا ۔
فیض احمد فیض 20نومبر1984کو73برس کی عمر میں اپنے خالق حقیقی سے جاملے۔ انہوں نے ساری زندگی ظلم، بے انصافی اور جبر و استبداد کے خلاف جدوجہد کی ، وہ اردو ادب کی ترقی پسند تحریک کے سب سے بڑے شاعر تھے۔فیض احمد فیض کی برسی کے موقع پرعلمی و ادبی حلقوں کے زیر اہتمام منعقدہ تقریبات میں ان کی خدمات کے اعتراف پر انہیں خراج تحسین پیش کیا جائے گا ۔
Short Link: https://urdu.app.com.pk/urdu/?p=526206
