راولپنڈی۔22مئی (اے پی پی):فیلڈ مارشل سیّد عاصم منیر کی زیر صدارت 270 ویں کور کمانڈرز کانفرنس جمعرات کو جی ایچ کیو راولپنڈی میں ہوئی جس میں فورم نے اندرونی وبیرونی سلامتی کے درپیش چیلنجز اور مجموعی سکیورٹی صورتحال کا تفصیلی جائزہ لیا۔فورم نے معرکہ حق کے ایک اہم اور فیصلہ کن مرحلے آپریشن بنیان مرصوص کی کامیاب تکمیل کو سراہا۔ کانفرنس میں آپریشن بنیان مرصوص اور ضلع خضدار میں دہشت گرد حملے کے شہداء کے ایصال ثواب کے لیے فاتحہ خوانی بھی کی گئی۔
شرکا کانفرنس کا کہنا تھا کہ خضدار میں یہ سفاکی بھارت کی پشت پناہی سے چلنے والی پراکسیز کے ذریعے کی گئی، دہشت گردی کے نتیجے میں 4 معصوم بچے اور 2 بے گناہ افراد شہید ہوئے۔فورم نے اس عزم کا اعادہ کیا کہ شہداء کا خون رائیگاں نہیں جائےگا، پاکستان کے عوام کا تحفظ مسلح افواج کی اولین ترجیح رہےگا۔ فیلڈ مارشل نے پاکستان کے عوام کی غیرمتزلزل حمایت کو خراج تحسین پیش کیا اور کہا کہ پاکستان کے عوام ہماری طاقت کا سرچشمہ ہیں، بیرونی جارحیت، دہشت گردی اور انتہا پسندی کے خلاف مشترکہ جدوجہد میں عوام کے اعتماد پر پورا اترنےکے لیے پرعزم ہیں۔
فورم کا کہنا تھا کہ نہتے شہریوں اور معصوم بچوں کو دانستہ نشانہ بنانا انسانیت کے بنیادی اصولوں کی خلاف ورزی ہے، ایسا عمل بین الاقوامی قوانین کی صریحاً اور قابل مذمت خلاف ورزی ہے۔فورم نے اندرونی اور بیرونی سلامتی کے درپیش چیلنجز اور مجموعی سکیورٹی صورتحال کا تفصیلی جائزہ لیا۔فورم نے کشمیریوں کی حق خود ارادیت کے لیے جاری منصفانہ جدوجہد اور کشمیریوں کی سفارتی، سیاسی اور اخلاقی حمایت کے غیر متزلزل عزم کا اعادہ کیا۔
Short Link: https://urdu.app.com.pk/urdu/?p=600276
