لاہور سمیت صوبہ بھر میں پولیس کے سرچ، سویپ ،کومبنگ آپریشنز اور فرضی مشقیں جاری

لاہور۔9مئی (اے پی پی):موجودہ سرحدی صورت حال کے پیش نظر لاہور سمیت صوبہ بھر میں پولیس کے سرچ، سویپ اینڈکومبنگ آپریشنز کے ساتھ ساتھ فرضی مشقیں بھی جاری ہیں۔آئی جی پنجاب ڈاکٹر عثمان انور نے بتایا کہ دہشتگردوں، ملک دشمن عناصر پر کڑی نظر رکھنے کے لئے سرچ، سویپ اینڈ کومبنگ آپریشنز کیے جارہے ہیں۔

جمعہ کو جاری بیان میں انہوں نے بتایا کہ گذشتہ 24 گھنٹوں کے دوران 380 کومبنگ آپریشنز، 14 ہزار مشتبہ افراد کی چیکنگ، 61 مشکوک افراد حراست میں لئے گئے جبکہ32 سرچ اینڈ سویپ آپریشنز، 3483 افراد سے پوچھ گچھ، 04 مشتبہ افراد گرفتار اور سنگین جرائم میں ملوث 167 اشتہاری، 155 عدالتی مفرور، 53 عادی مجرمان بھی گرفتار کئے گئے ہیں۔

انہوں نے بتایاکہ جرائم پیشہ و مشتبہ افراد کے قبضہ سے بڑی تعداد میں ناجائز اسلحہ اور گولیاں برآمد کی گئیں جبکہ جرائم پیشہ افراد کے خلاف کارروائی کے دوران 05 مجرمان کیفر کردار کو پہنچے، 07 زخمی، 06 گرفتار کرلئے گئے ہیں۔ آئی جی پنجاب نے کہا کہ کسی بھی ہنگامی صورت حال سے نمٹنے کیلئے فرضی مشقیں بھی کی جا رہی ہیں،

فرضی مشقوں میں پنجاب پولیس، ایلیٹ فورس، سی ٹی ڈی، سپیشل برانچ، ریسکیو 1122، بم ڈسپوزل سکواڈ و قانون نافذ کرنے والے دیگر اداروں کی ٹیمیں حصہ لے رہی ہیں،فرضی مشقوں کا مقصد کسی بھی ناگہانی صورتحال سے نمٹنا، خطرات سے بچاو، شہریوں کو بحفاظت ریسکیو کرنا، رسپانس ٹائم مزید بہتر بنانا ہے۔ انہوں نے کہا کہ موجودہ سرحدی صورتحال کے پیش نظر سکیورٹی، لا اینڈ آرڈر، امدادی سرگرمیاں یقینی بنانے کے لئے فرضی مشقیں جاری رہیں گی۔

Short Link: https://urdu.app.com.pk/urdu/?p=594709