لاہور۔11مئی (اے پی پی):لاہور سمیت پنجاب کے مختلف اضلاع میں آندھی، بارش اور ژالہ باری، آسمانی بجلی گرنے سے 36سالہ شخص جاں بحق ہو گیا۔ ترجمان پی ڈی ایم اے کے مطابق اتوار کے روز صوبائی دارالحکومت لاہور اور نارووال سمیت دیگر بالائی اضلاع میں شدید بارش اور ژالہ باری ریکارڈ کی گئی۔دریں اثنا ڈی جی پی ڈی ایم اے عرفان علی کاٹھیا کی صوبہ بھر کے ڈپٹی کمشنرز اور ریسکیو اداروں کو الرٹ رہنے کی ہدایت کی ہے ۔انہوں نے کہا کہ ہنگامی صورتحال سے نمٹنے کے لیے متعلقہ محکمے الرٹ رہیں،صوبائی کنٹرول روم سمیت تمام اضلاع کے ڈسٹرکٹ ایمرجنسی آپریشن سنٹرز کو بھی الرٹ کر دیا گیا ہے۔
انہوں نے کہا کہ پی ڈی ایم اے کنٹرول روم میں صورتحال کی مانیٹرنگ مسلسل جاری ہے۔ڈی جی نے کہا کہ شہری احتیاط کریں، بجلی کے کھمبوں اور لٹکتی تاروں سے دور رہیں۔آسمانی بجلی سے بچاو کیلئے محفوظ مقامات پر رہیں۔ انہوں نے کہا کہ خراب موسم اور آسمانی بجلی کی گرج چمک کے دوران کھلے مقامات پر ہر گز نہ رکیں۔انہوں نے کہا کہ ساہیوال دوانے والا میں آسمانی بجلی گرنے سے 36 سالہ رمضان نامی شخص جاں بحق ہو گیا۔غیر ضروری سفر سے پرہیز کریں اور گاڑی آہستہ چلائیں ۔انہوں نے کہا کہ شہری مدد کیلئے پی ڈی ایم اے کی ہیلپ لائن 1129پر کال کر سکتے ہیں۔
Short Link: https://urdu.app.com.pk/urdu/?p=595833
