لاہور میں نواز شریف انسٹی ٹیوٹ آف کینسر ٹریٹمنٹ اینڈ ریسرچ کا قیام عمل میں لایا جا رہا ہے،صوبائی وزیر صحت

لاہور۔4فروری (اے پی پی):صوبائی وزیر صحت خواجہ سلمان رفیق نے کینسر سے آگاہی اور بچائو کے عالمی دن کے موقع پر اپنے پیغام میں کہا کہ آج پوری دنیا میں کینسر سے آگاہی اور بچائو کا دن منایا جا رہا ہے۔ہمیں پاکستان میں کینسر کی تشخیص،پری وینشن اور علاج و معالجہ کی جدید سہولیات پر کام کرنا ہو گا۔خواجہ سلمان رفیق نے کہاکہ لاہور میں ملکی تاریخ کا سب سے بڑا نواز شریف انسٹی ٹیوٹ آف کینسر ٹریٹمنٹ اینڈ ریسرچ کا قیام عمل میں لایا جا رہا ہے۔

مریم نواز نے پنجاب کی وزارت اعلی کا منصب سنبھالتے ہی لاہور میں سٹیٹ آف دی آرٹ نواز شریف انسٹی ٹیوٹ آف کینسر ٹریٹمنٹ اینڈ ریسرچ شروع کرنے کا اعلان کردیا تھا۔وزیر صحت پنجاب نے کہاکہ نوازشریف انسٹی ٹیوٹ آف کینسرٹریٹمنٹ اینڈریسرچ کے قیام پر 82 ارب روپےکی لاگت آئے گی، ہر سال کینسرکے ہزاروں مریض علاج ومعالجہ کی بین الاقوامی سطح کی سہولیات حاصل کر پائیں گے۔نواز شریف انسٹی ٹیوٹ آف کینسر ٹریٹمنٹ اینڈ ریسرچ کی سب سے بڑی خاصیت یہ ہے کہ یہاں کینسرکے لیول 3 اور4 کے مریضوں کا بھی علاج مفت کیاجائے گا۔انہوں نے کہا کہ وزیر اعلی کا کینسر میں مبتلا مریضوں کو مفت ادویات کی فراہمی کا منصوبہ بھی کامیابی سے جاری ہے، اب ایک بہترین طریقہ کارکے تحت کینسر کے مریضوں کو ان کے گھروں میں ہر ماہ ادویات بذریعہ کوریئر پہنچائی جا رہی ہیں۔

Short Link: https://urdu.app.com.pk/urdu/?p=555863