لاہور۔14 اگست (اے پی پی )لاہور چیمبر آف کامرس اینڈ انڈسٹری میں پاکستان کے 70ویں یوم آزادی کے موقع پر پرچم کشائی کی شاندار تقریب منعقد ہوئی جس میں لاہور چیمبر کے عہدیداروں، ایگزیکٹو کمیٹی اراکین اور تاجر برادری کے نمائندوں کی بڑی تعداد شریک ہوئی۔ تلاوتِ کلام پاک سے تقریب کا آغاز ہوا جس کے بعد قومی ترانے کی دھن بجائی گئی ۔ لاہور چیمبر کے قائم مقام صدر امجد علی جاوا، نائب صدر محمد ناصر حمید خان ، میاں انجم نثار، ہارون اروڑہ ، میاں وقار و دیگر نے پاکستان کا پرچم بلند کیا جس کے بعد تقریب کے شرکاءنے ملک و قومی کی سلامتی، ترقی و خوشحالی کے لیے دعا کی۔ لاہور چیمبر کے صدر عبدالباسط، قائم مقام صدر امجد علی جاوا اور نائب صدر محمد ناصر حمید خان نے اپنے خصوصی پیغام میں ساری قوم کو پاکستان کے 70ویں یوم آزادی کی مبارکباد دیتے ہوئے قائد اعظم محمد علی جناح کو خراجِ تحسین پیش کیا جن کی بہترین لیڈرشپ ، دیانتداری اور فہم و دانش کی بدولت ہمیں ایک خود مختار وطن حاصل ہوا۔ انہوں نے کہا کہ 14اگست صرف ایک تقریب نہیں بلکہ تاریخ کا ایک اہم باب ہے کیونکہ اس روز برصغیر پاک و ہند کے مسلمانوں کو اپنی جدوجہد کا صلہ ملا اور انہیں غیرملکی تسلط سے آزادی نصیب ہوئی۔
Short Link: https://urdu.app.com.pk/urdu/?p=66055
