لاہور۔2دسمبر (اے پی پی):گورنر پنجاب محمد بلیغ الرحمن سے ہفتہ کو یہاں گورنر ہائوس میں لمز کے طلبہ کے وفد نے ملاقات کی۔ وفد میں قانون اور سیاست کے شعبے کے طلبہ شامل تھے۔ گورنر پنجاب نے طلبہ کو گورنر ہائوس لاہور میں خوش آمدید کہا اور گورنر ہائوس کی تاریخی اہمیت سے آگاہ کیا۔اس موقع پر گورنر پنجاب نے طلبہ سے خطاب کرتے ہوئے کہا کہ لمز ایک اہم تعلیمی ادارہ ہے جس میں طلبہ کی تجزیاتی اور تنقیدی صلاحیتوں کو نکھارا جاتا ہے۔
انہوں نے کہا کہ تعلیم کا سب سے اہم مقصد اپنے اندر برداشت پیدا کرنا ہے،ایک معاشرے میں مختلف لوگوں کی مختلف سوچ اور آرا ہو سکتی ہیں، ایک مخلوط معاشرے میں دوسروں کی رائے کا احترام کرنا بہت ضروری ہے تاکہ معاشرے میں امن قائم رہ سکے۔گورنر پنجاب نے کہا کہ پاکستان کی نوجوان آبادی اس کا سب سے بڑااثاثہ ہے، بدقسمتی سے نوجوانوں میں ایک غلط بیانیے کے تحت مایوسی پیدا کی گئی۔انہوں نے کہا کہ ہمارے ملک میں منفی چیزیں کم اور مثبت چیزیں زیادہ ہیں، ایدھی اور اخوت جیسے اداروں کی روشن مثالیں ہمارے سامنے ہیں۔
گورنر پنجاب نے کہا کہ ایدھی ایمبولینس دنیا میں پرائیویٹ ایمبولینس کا سب سے بڑا نیٹ ورک ہے جبکہ اخوت فائونڈیشن کے تحت قرضہ حسنہ واپس کرنے کی شرح 99 فیصد سے زائد ہے ۔ انہوں نے کہا کہ جو لوگ قرضہ واپس کرتے ہیں ،وہ غریب طبقے سے تعلق رکھتے ہیں، ان سے گارنٹی بھی نہیں لی جاتی لیکن پھر بھی وہ قرضہ واپس کرتے ہیں ۔ گورنر پنجاب نے طلبہ سے کہا کہ ایک تعلیم یافتہ انسان تحقیق کرتا ہے اور سنی سنائی بات پر یقین نہیں کرتا۔
انہوں نے مزید کہا کہ اگر ہر شخص ذمہ داری کا مظاہرہ کرے اور سوشل میڈیا پر باتیں بغیر تحقیق کے آگے نہ پھیلائے تو معاشرے میں غلط اور منفی باتوں کے پھیلائو کو روکا جا سکتا ہے۔انہوں نے کہا کہ قانون اور آئین کی بالادستی سے ہی آگے بڑھا جا سکتا ہے، بدقسمتی سے سب سے زیادہ آئین شکنی کے مرتکب ہونے والے دوسروں کے صاف دامن پر الزام لگاتے نظر آ رہے ہیں۔
اس موقع پرگورنر پنجاب محمد بلیغ الرحمن نے طلبہ کے کئی سوالوں کے جوابات بھی دیئے اور انہیں گورنر کے آئینی کردار کے بارے میں بتایا ،آخر میں طلبہ کو تاریخی گورنر ہائوس لاہور کا دورہ بھی کرایا گیا۔
Short Link: https://urdu.app.com.pk/urdu/?p=415886
