اسلام آباد۔20مئی (اے پی پی):وفاقی وزیر برائے قومی غذائی تحفظ و تحقیق رانا تنویر حسین نے بین الاقوامی سطح پر پاکستانی زیتون کے تیل کو ملنے والی پذیرائی کو زراعت کے شعبے میں پاکستان کی تاریخی کامیابی قرار دیا ہے، یہ کامیابی وزارت کے اس وژن کی عکاس ہے جس کا مقصد پاکستان کو زرعی اور غذائی پیداوار میں خود کفیل بنانا ہے۔
یہ بیان انہوں نے لورالائی اولیوز کے اس کارنامے پر دیا جس نے نیویارک انٹرنیشنل اولیو آئل کمپیٹیشن 2025 میں سلور ایوارڈ حاصل کیا جو کہ زیتون کے تیل کا دنیا کا سب سے بڑا اور معتبر مقابلہ ہے، دنیا بھر سے 1200 سے زائد برانڈز کی شرکت کے باوجود بلوچستان کے ضلع لورالائی سے تعلق رکھنے والے اس برانڈ نے اپنی معیاری پیداوار، پائیدار طریقہ کار اور عمدہ پیکجنگ کی بدولت عالمی سطح پر پاکستان کا نام روشن کیا۔
وفاقی وزیر رانا تنویر حسین نے کہا کہ یہ عالمی پذیرائی ہر پاکستانی کے لئے فخر کا لمحہ ہے اور وزارت کی دیرینہ کوششوں کا ثمر ہے، لورالائی کی کامیابی، پاکستان کی کامیابی ہے۔ وفاقی وزیر نے بتایا کہ 2012 سے وزارت کی جانب سے شروع کئے گئے زیتون منصوبے کے تحت ملک بھر میں اولیو ویلیو چین قائم کی گئی جس کے ذریعے کسانوں کو معیاری پودے، جدید ایکسٹریکشن یونٹس، سٹوریج، بوتل بندی کی سہولیات اور تربیتی پروگرامز فراہم کئے گئے تاکہ وہ عالمی معیار کے مطابق پیداوار دے سکیں۔
لورالائی اولیوز اس وژن کی ایک کامیاب مثال ہے، اس برانڈ نے بلوچستان کے مقامی کاشتکاروں کے ساتھ مل کر اربیکینا قسم کے زیتون کو ہاتھوں سے چن کر حکومت کی فراہم کردہ کولڈ ایکسٹریکشن مشینری کے ذریعے فوری طور پر پروسیس کیا، ہر بیج کو بین الاقوامی معیار کے مطابق جانچا گیا جس میں تیزابیت، خالص پن اور ذائقہ شامل تھے اور اسی معیار کی بنیاد پر اسے عالمی اعزاز سے نوازا گیا۔وفاقی وزیر نے زور دیتے ہوئے کہا کہ جب پاکستان ہر سال 4.5 ارب ڈالر کا خوردنی تیل درآمد کر رہا ہو تو یہ کامیابی ثابت کرتی ہے کہ ہمارے پاس وہ تمام وسائل موجود ہیں جو اس انحصار کو ختم کر سکتے ہیں۔
وفاقی وزیر نے مزید کہا کہ بلوچستان میں اس کامیابی سے یہ بھی ظاہر ہوتا ہے کہ وفاقی حکومت پسماندہ علاقوں کی ترقی، پائیدار زراعت کے فروغ اور درآمدی بوجھ کو کم کرنے کے لئے سنجیدہ اقدامات کر رہی ہے۔وزارت اب تک 85 سے زائد زیتون سے متعلقہ سٹارٹ اپس کو فنی اور مالی معاونت فراہم کر چکی ہے۔وفاقی وزیر نے کہا کہ کسانوں کو برانڈنگ، سرٹیفیکیشن، کوالٹی اشورنس اور بین الاقوامی معیار کی تربیت مہیا کی گئی ہے تاکہ وہ عالمی منڈی میں اپنا مقام بنا سکیں، ہم پاکستان کو درآمدی معیشت سے نکال کر برآمدی طاقت میں تبدیل کرنا چاہتے ہیں، لورالائی اولیوز ہماری اس نئی سمت کی شروعات ہے۔
وزیر رانا تنویر حسین نے لورالائی کے کسانوں اور LO ٹیم کو اس غیر معمولی کارکردگی پر مبارکباد دی اور اس عزم کا اظہار کیا کہ پنجاب، خیبر پختونخوا اور گلگت بلتستان میں زیتون کی کاشت کو وسعت دی جائے گی۔وفاقی وزیر نے کہا کہ ہم اس وقت تک آرام سے نہیں بیٹھیں گے جب تک پاکستان خطے میں اعلیٰ معیار کے زیتون کے تیل کا مرکز نہیں بن جاتا۔
Short Link: https://urdu.app.com.pk/urdu/?p=599342
