لاہور۔11فروری (اے پی پی):ٹیلی ویژن اورریڈیو کے لیجنڈ اداکار قاضی واجد کی 6 ویں برسی11فروری بروز اتوار کو منائی گئی ۔ قاضی واجد 1943ء میں لاہور میں پیدا ہوئے، ان کا اصل نام قاضی عبدالواجد انصاری تھا۔ انہوں نے قیام پاکستان کے بعد اپنے خاندان کے ہمراہ کراچی میں سکونت اختیار کی،
انہوں نے 10 برس کی عمر میں اپنے فنی کیریئر کا آغاز کیا اور پہلی مرتبہ بچوں کے پروگرام” نونہال ”میں بطور صدا کار کام کیا،وہ 25 برس تک ریڈیو سے منسلک رہے اور اپنی شاندار صداکاری سے اپنی صلاحیتوں کا لوہا منوایا،60 ء کی دہائی میں پاکستان ٹیلی ویژن کا آغاز ہوا تو قاضی واجد اس سے منسلک ہو گئے، انہوں نے ٹی وی کیلئے پہلا ڈرامہ ”ایک ہی راستہ تھا” جس میں انہوں نے منفی کردار نبھایا جبکہ ڈرامہ ”خدا کی بستی” قاضی واجد کی شہرت کا باعث بنا ۔
انہوں نے ٹیلی ویژن پر بے شمار کردار نبھائے تاہم دھوپ کنارے، ان کہی، تنہائیاں، حوا کی بیٹی، خدا کی بستی، چاند گرہن، پل دو پل، تعلیم بالغاں اور انارکلی ان کے مشہور ڈرامے ہیں، حکومت پاکستان کی جانب سے شوبز انڈسٹری میں اعلیٰ کارکردگی پر انہیں 14 اگست 1988ء کو صدارتی تمغہ برائے حسن کارکردگی سے بھی نوازا گیا۔ قاضی واجد 11فروری 2018ء کو 87 برس کی عمر میں دل کا دورہ پڑنے سے اپنے خالق حقیقی سے جا ملے ۔
Short Link: https://urdu.app.com.pk/urdu/?p=438497
